د کب ۶مه نېټه   کابل
د  چاپېریال ساتنې ملي ادارې عمومي رئیس شاه زمان میوندي د نیالګیو کېنولو ملي پروسې په تړاو د جمهوري ریاست عالي مقام د حکم د لا ښه پلي کېدو او دې ملي پروسې ته د والیانو د لا ډېرې پاملرنې په موخه تېره ورځ د کب په ۵مه نېټه له ځینو والیانو سره ټلیفوني خبرې وکړې.
ښاغلي میوندي د کندهار، لغمان، سرپل، جوزجان، بادغیس، غور، فراه، نیمروز، ارزګان، میدان وردګو، غزني، پکتیا، لوگر او د سمنگانو له والیانو سره ټلیفوني خبرې وکړې او د  نیالګیو کېنولو ملي کمپاین یې یوه ملي پروسه وګڼله او د نیالګیو کېنولو سږني پلان په پلي کولو کې یې د والیانو جدي پاملرنه وغوښته. نوموړي له والیانو سره په ټلیفوني خبرو کې وویل: د ۲۵میلونه نیالګیو کېنولو پلان د تطبیق لپاره باید د هیواد په ګوټ ګوټ کې د دولتي کارکوونکو، محصلینو، زده کوونکو او د ټولنې د ټولو اقشارو په ګډون پراخ کمپاینونه وشي او همدا راز د کېنول شوو نیالګیو ښه ساتنه او پالنه وشي.
ښاغلي میوندي ټینګار وکړ چې په مرکز او ولایتونو کې به د چاپېریال ساتنې ملي ادارې مسوولین او ټول کارکوونکي په بشبړ ډول له دې ملي پروسې څخه ملاتړ وکړي.
والیانو هم د دغې ملي پروسې څخه خپل ملاتړ اعلان کړ او ډاډ یې ورکړ چې د دې ملي پروسې د پیاوړتیا لپاره به د شته امکاناتو پر مټ جدي هلې ځلې وکړي.