وروستی
د چاپېریال ساتنې ملي ادارې عمومي رئیس د دې ادارې کارکوونکو ته د اختر مبارکۍ ترڅنګ اصلاحي وینا وکړه
۱۴۴۶کال د شوال ۷نېټه/ کابل
د چاپېریال ساتنې ملي ادارې عمومي رئیس مولوي مطیع الحق
خالص نن شنبه د ۱۴۰۴کال
د وري په ۱۶مه
نېټه د دې ادارې د بند امیر غونډو په تالار کې د ادارې ټولو مسوولینو او منسوبینو
ته د اختر مبارکۍ سربېره اصلاحي وینا وکړه.
د اختر مبارکۍ په پار جوړو شوو مراسمو کې د دې ادارې عمومي
رئیس مولوي مطیع الحق خالص د چاپېریال ساتنې ملي ادارې ټولو مسوولینو او منسوبینو
ته د اختر مبارکي ورکړه او زیاته یې کړه چې له نېکه مرغه د سږني اختر ورځې مو په هېواد
کې د بشپړ امنیت او ورورګلوۍ په فضا کې ولمانځلې چې دا پر افغانانو د الله تعالی
ستره لورینه وه؛ نو موږ ته پکار ده چې د الله تعالی شکرانه ادا کړو او د اسلامي
نظام ملاتړ وکړو. ده په خپلو خبرو کې وویل: هر څه د انسان ژوند کې تاثیر لري، موږ
چې په روژه کې کوم عبادتونه او نیک اعمال ترسره کړي دي هغه باید په دوامداره توګه
ترسره کړو.
ښاغلي خالص وویل: د مسلمان خاصیت باید داسې وي چې عبادت یې
هم پر دنیوي او هم پر اخروي ژوندانه ژور تاثیر ولري او خپل نېک اعمال یوازې د
رمضان تر میاشتې پورې محدود نه کړي. ده زیاته کړه چې د روژې په میاشت کې الله تعالی
زموږ روحونه او جسمونه د نیکو اعمالو په وسیله ووینځل؛ نو موږ باید خپلو اعمالو او
کړو وړو ته پاملرنه وکړو.
د چاپېریال ساتنې ملي ادارې عمومي رئیس له ټولو کارکوونکو
وغوښتل چې خپل کارونه په صداقت او ایماندارۍ ترسره او د الله تعالی د مخلوق خدمت
وکړي.
نوموړي ټینګار وکړ چې موږ باید د روژې مبارکې میاشتې څخه
الهام واخلو، خپل کړه وړه د الله تعالي د اوامرو مطابق ترسره کړو او په خپلو
کارونو کې باید په صداقت قدمونه واخلو؛ ځکه دا زموږ ټولو مسوولیت دی.
د مراسمو په پای کې د چاپېریال ساتنې ملي ادارې عمومي رئیس
مولوي مطیع الحق خالص ټولو کارکوونکو سره د اختر مبارکي وکړه او کارکوونکي یې خپلو
کارونو ته وهڅول.