وروستی
د نېکمرغه کوچني اختر په مناسبت د چاپېریال ساتنې ملي ادارې عمومي رئیس د مبارکۍ پیغام
قدرمنو هېوادوالو!
د چاپېریال ساتنې ملي ادارې په استازیتوب د نېکمرغه کوچني اختر د را رسېدو له امله، د افغانستان دروند ولسمشر، د دولت مشرتابه، ولسي او مشرانو جرګو قدرمنو غړو او ټول افغان ولس ته د زړه له کومې مبارکي وایم.
درنو هېوادوالو!
سږ کال مو په داسې حال کې د روژې مبارکه میاشت تېره کړه چې کورونا وبا ټوله نړۍ او افغانستان له ستر روغتیایي ګواښ سره مخ کړی و.
د دې وبا لامل د ډېرو نورو لاملونو ترڅنګ له طبیعت سره د بشر ظالمانه چلند په ګوته شوی او د دې مرګونې وبا خپرېدو، انسانانو ته دا پیغام ورکړ چې پر طبیعت مهربانه شي. له طبیعت څخه ناوړه ګټه اخېستنه انسانانو ته د مرګ په بیه تمامېدای شي.
د چاپېریال ساتنې ملي اداره د طبيعي ارزښتونو او چاپېریال ساتنې ته ژمنه ده او خپل مسوولیت به په سمه توګه ادا کوي؛ خو په دې برخه کې د قدرمنو هېوادالو همکاري اړینه ده.
الله تعالی دې د دې مبارکې میاشتې او نېکمرغه اختر بختورو شپو او ورځو په برکت سره، په هېواد کې دا بدمرغه جګړه او تاوتریخوالی ختم او رنځور افغان ولس دې د سولې او امنیت په نعمت مالامال کړي.
بې له شکه چې جګړه ارزښتونه ختموي او تر هر څه وړاندې د یوه هېواد چاپېریال ته ستر زیان پېښوي، پر وحشي ژويو ناوړه اغېزه کوي او د ډېرو ناوینونو سربېره طبیعي سرچینې ګواښي.
ګرانو هېوادوالو!
زه خوښ یم چې د چاپېریال ساتنې ملي اداره کې مې د هېواد د ولسمشر او تاسو قدرمنو هېوادوالو په ملاتړ څو کاله خدمت کړی او په دې برخه کې مو مهمه لاسته راوړنې ترلاسه کړي دي. په تحقیق سره زموږ بریاوې ستاسو او د ا.ا.ج دولت د ښې همکارۍ پایله ده.
درنښت
شاه زمان میوندي
د چاپېریال ساتنې ملي ادارې عمومي رئیس