وروستی
نورستان د ملي پارک او وحشي ژویو د ساتنځي په توګه اعلان شو
د غبرګولي ۱۸مه/پارون د نورستان ولایت د چاپېریال ساتنې ریاست له خوا د غبرګولي په ۱۸مه نېټه د چاپېریال نړیواله ورځ د ځانګړو مراسمو په ترڅ کې په پارون کې په داسې حال کې ولمانځل شوه چې د جلالتمآب ولسمشر او د چاپېریال ساتنې ملي ادارې عمومي رئیس شاه زمان میوندي له خوا رسماً نورستان ولایت د ملي پارک او وحشي ژویو د ساتنځي په توګه اعلان شو. په دغه مناسبت جوړو شویو مراسمو کې مرستیال والي، د دولتي ادارو استازو، قومي مشرانو، علمای کرامو، مدني فعالانو او رسنیو استازو ګډون کړی وو. د غونډې په پیل کې د ملي پارک په توګه د نورستان ولایت د اعلانېدو له امله ګډونوالو ته مبارکي ورکړل شوه او مرستیال والي محمدهاشم فیضي په قومي مخورو او ځوانانو غږ وکړ چې د چاپېریال خوندي ساتلو او هوسا چاپېریال رامنځته کولو لپاره، دولت سره اوږه په اوږه کار وکړي. د نورستان ولایت د چاپېریال ساتنې رئیس عبدالخالق خالقیار په خپلو خبرو کې وویل: نورستان د طبیعي منظرو، ځنګلونو او وحشي ژویو له پلوه یو بډایه ولایت دی؛ خو د ځنګلونو او طبیعي منظرو ساتل د ټولو هېوادوالو ګډ مسوولیت دی. نوموړي وویل: نورستان چې کوم ډول نباتات او وحشي_ژوي لري، په نورو سیمو کې کم او یا هیڅ نشته؛ نو باید د له منځه تللو مخه یې ونیول شي. د غونډې په لړ کې د دولتي ادارو استازو او قومي مشرانو د چاپېریال ساتنې په هکله سپارښتنې وکړې او ژمنه یې وکړه چې د ځنګلونو او وحشي ژویو د ساتنې لپاره به له دولت سره پوره همکاري کوي. طبیعت لپاره وخت