وروستی
د چاپېريال ساتنې په ملي اداره کې د بيرغ ملي ورځې نمانځنه
کابل - د 1399 د اسد 7مه
د چاپيريال ساتنې په ملي اداره کې د بيرغ ملي ورځې نمانځنه وسوه. په دې غونډه کې د يادې ادارې عمومي رئیس شاه زمان ميوندي، مسلکي مرستيال؛ انجنیر عزت الله صديقي او نورو کارکوونکو ګډون کړى و.
د چاپېريال ساتنې ملي ادارې عمومي رئیس د هيواد د درې رنګه بيرغ تر پورته کولو وروسته؛ د دې ورځې له امله د هيواد ټولو هيوادوالو ته مبارکي وويله او زياته يې کړه؛ چې درې رنګه بيرغ زموږ د ملي وحدت او هويت سمبول دى؛ چې د افغانستان د تاريخ، کلتور او ارزښتونو ښکارندويي کوي.
ښاغلي ميوندي د بيرغ تور رنګ د ښکېلاک د دورې، سور رنګ د هيواد د خپلواکۍ د اتلانو او شهيدانو وينه او زرغون رنګ يې د هيواد په پرمختګ او پرمختيا تعبير کړل او ويې ويل چې زموږ نيکونو د دې بيرغ د ساتنې لپاره ډېرې سرښندنې کړي دي.
د چاپېريال ساتنې ملي ادارې عمومي رئیس وويل؛ د دې لپاره چې روغه ټولنه ولرو؛ روغ چاپېريال ته اړتيا لرو. نو بايد د دولت د مشرۍ په چوکاټ کې د خلکو د هوساینې او روغتيا لپاره د هر ډول چاپیریاليزو ستونزو لکه؛ د هوا ککړتيا، د اوبو ککړتیا، اقليمي بدلون، د ځنګلونو او ژوند بڼو تخريب په وړاندې زيار وباسو او جدي اقدامات وکړو.
د يادونې وړ ده؛ چې د هيواد درې رنګه بيرغ زموږ د ولس د غرور، ميړانې او وياړ نښه ده او د دې ملي سمبول د نمانځنې لپاره د اسد ٧مه نېټه د بيرغ د ملي ورځې په توګه نومول سوې ده او هر کال دا ورځ په ټول هيواد کې د بېلابېلو پرتمينو غونډو له لارې نمانځل کېږي.