وروستی
د افغانستان اسلامي جمهوريت او تاجکستان هېواد تر منځ د چاپېریالي همکاریو په برخه کې تفاهم لیک لاسلیک شو
د وږي ۲۷مه/ کابل
د افغانستان اسلامي جمهوریت او تاجکستان هېواد د چاپېریال ساتنې ادارو تر منځ، نن پنج شنبه د وږي په ۲۷مه نېټه د دوشنبې په ښار کې د افغانستان د چاپېریال ساتنې ملي ادارې عمومي رئیس شاه زمان میوندي او د هغه تاجک سیال، شیر علي زاده احمد جان تر منځ د دوه اړخیزه چاپېریالي موضوعاتو د تبادلې په برخه کې د همکارۍ تفاهم لیک لاسلیک شو.
د دې تفاهم لیک په اساس به دواړه هېوادونه د چاپېریالي موضوعاتو په برخه کې لکه: د ژوند بڼو، ایکوسیستم، د وحشي ژوو او مرغانو د اوسېدنځایونو د ساتنې؛ له نړیوالو مالي میکانیزمونو څخه د مرستو ترلاسه کولو او پروژه په تطبیق کې دوه اړخیزه همکاري او د آمو سیند او د اوبو له نورو سرچینو څخه په ګډه نظارت د دې تفاهم لیک له اړینو مواردو څخه دي.
د چاپېریال ساتنې ملي ادارې مشرتابه هڅه کوي چې د ګاونډي هېواد تاجکستان په شمول د چاپېریالي ګواښونو د راکمولو او اقلیمي بدلون سره د مبارزې او سازښت په برخه کې ښې او پیاوړې اړیکې ولړي.
د دې تفاهم لیک د تطبیق لپاره به د دواړو هېوادونو د استازو په ګډون د چاپېریال ساتنې په برخه کې د راتلونکو برنامو او پروژو د پلان او پلي کولو د څرنګوالي په اړه، ګډ تخنیکي ټیم جوړ شي.
د چاپېریال ساتنې ملي اداره د خپل تاجک سیال د ښې همکارۍ له امله مننه کوي او د دغه تفاهم لیک د پلي کولو په موخه د دواړو هیوادونو د ملي ګټو په چوکاټ کې جدي همکاري اعلانوي.