وروستی
په چاپېریال سانته کې پولیس تر ټولو مهم مسوولیت لري
۱۳۹۹- د تلې لومړۍ نیټه - کابل
د چاپېریال ساتنې ملی ادارې د اطلاعاتو او عامه اړیکو ریاست د سه شنبې په ورځ د ستر جنرال شهید عبدالرازق اڅکزي د پولیسو اکاډمۍ ۲۵۰تنو محصلیونو ته د چاپېریالي جرمنو او په چاپېریال ساتنه کې د پولیسو_مسوولیت په تړاو دوه ورځنی ورکشاپ پیل کړ.
په پیل کې د چاپېریال ساتنې ملي ادارې مسلکي معین انجنیر عزت الله صدیقي د چاپېريالي مسایلو او په چاپېریال ساتنه کې د پولیسو د مسوولیت په هکله وینا وکړه او ویې ویل: الله ج ټول موجودات او کاینات د انسانانو د تلپاتې ګټې اخیستنې لپاره پیدا کړي؛ تر څو خپلې اړتیاوې ترې پوره کړي؛ خو انسانانو، نه دا چې له دغه کایناتو او موجوداتو تلپاتې او سالمه ګټه نه ده اخيستې، بلکي د ځمکې د منابعو د خرابوالي سبب شوي دي.
ښاغلي صدیقي زیاته کړه پولیس د خلکو او وطن ساتونکي دي، معلومه خبره ده چې پولیس په اوسني حالت کې د جګړې په لیکو کې بوخت دي؛ خو هیلې به لرو چې الله ج سوله راولي او له سولې وروسته به زموږ پولیس، هغه پولیس وي چې د چاپېریال ساتنې، ځنګلونو وهلو، د حیواناتو قاچاق او نورو چاپېریالي ګواښونو د مخنیوي په برخه کې به کار کوي او په دې برخه کې مکلف دي چې د قانون په رڼا کې د چاپېریالي سرغړونو مخنیوی وکړي؛ همدا ځای دی چې پولیس د چاپېریال ساتنې په برخه کې تر ټولو مهم مسولیت لري.
ورپسې د پولیسي زده کړو رییس پوهنمل ذبیح الله ناظمي د چاپېریال ساتنې ملي ادارې له ګډو همکاریو مننه وکړه او زیاته یې کړه: پولیس مکلف دي چې د چاپېریالي جرمونو مخنیوی وکړي او همدارنګه مسولیت لري چې د اساسي قانون او چاپېریال قانون په رڼا کې د هغو کړنو مخه ونیسي، کوم چې د چاپېریال په برخه کې ګواښونه ولاړوي.
همدارنګه د چاپېریال ساتنې ملي اداري حقوقي مشاور نعمت الله سلطاني وویل: د چاپېریالي تخلفاتو د مخنیوي په برخه کې همدا تاسو پولیس یاست، چې قانون پلی کوئ او د ناقانونه کړنو مخنیوی کوی. ده د چاپېریال ساتنې په برخه کې د پولیسو رول مهم وباله او په دې برخه کې یې له پولیسو د لا ډېرې همکارۍ غوښتنه وکړه.
هېره دې نه وي چې په دغه دوه ورځني ورکشاپ کې د جزا کوډ، اقلیمي بدلون، ساتل شویو سیمو، ژوند بڼو او چاپېریالي ککړتیاوو په برخه کې ګډونوالو ته معلوماتي پرېزنټېشنونه وړاندې شول او همدا راز د ګډونوالو پوښتنو ته ځوابونه ورکړل شول.
پولیس قانون او چاپېریال سانته