وروستی
د افغانستان د ګازو پروژې (AGASP) د چاپېریالي او ټولنیزو چارو د ارزونې په پار له اړوند ادارو سره مشورتي غونډه ترسره شوه
د تلې ۶مه نېټه/ کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ د افغانستان د ګازو پروژې (AGASP) د چاپېریالي او ټولنیزو چارو د ارزونې په پار د ګازو په پروژه کې د ښکېلو ادارو له استازو سره د دې ادارې د بند امیر د غونډو په تالار کې مشورتي ناسته ترسره شوه چې پکې د کلیو پراختیا، عامې روغتیا، کرنې او مالدارۍ، د ښځو چارو، د کانونو او پترولیم وزارتونو او نورو اړوندو ادارو 50 تنو استازو ګډون کړی وو.
په پیل کې د چاپېریال ساتنې ملي ادارې مسلکي معین ګډونوالو ته ښه راغلاست ووایه او د داسې غونډو جوړېدل یې خورا اړین او با ارزښته وبلل، ده زیاته کړه: د چاپېریال_قانون او چاپېریالي او ټولنیزو چارو د ارزونې مقررې پر بنسټ د هرې پروژې له تطبیق څخه مخکې باید د پروژو د چاپېریالي او ټولنیزو چارو اروزنه وشي.
ښاغلي صدیقي وویل: په کومو پروژو کې چې د چاپېریالي چارو ارزونه په پام کې و نه نیول شي پایلې یې ډېرې خطرناکې وي؛ نو اړینه ده چې د هرې پروژې له پلي کېدو څخه مخکې باید موږ له ټولو ښکېلو خواوو سره داسې غونډې جوړې کړو چې په هغه کې د پروژو ګټې، زیانونه، منفي او مثبتې چاپېریالي او ټولنیزې اغېزې و ارزول شي.
نوموړي له ګډونوالو غوښتنه وکړه چې خپلې سلا مشورې، نظرونه، پوښتنې او وړاندیزونه له موږ سره شریک کړي؛ ترڅو د چاپېریالي جوازونو په ورکړه کې اسانتیا رامنځته شي.
د غونډې په لړ کې د ډینامیک وېژن شرکت د برنامو مدیر لطف الله فقیرزاده لخوا د ګازو پروژې د تطبیق د څرنګوالي په هکله معلوماتي پرزنټېشن وړاندې شو او د ګډونوالو پوښتنو ته یې ځوابونه ورکړل.
د یادولو وړ ده چې د افغانستان د ګازو پرژه د افغان دولت په مالي لګښت د ښکېلو خواوو په همکارۍ پلې کیږي، رغنیزې چارې به یې په ۲۰۲۱ زیږدیز کال کې پيل او د ۶ او ۱۳ میاشتو په موده کې به بشپړې شي.
د ګازو دغه فولادي نل لیکه به د پخواني ګازو پایپ لاین په خوا کې له شبرغان څخه تر مزارشریف ښار پورې د 89 کیلومټرو په واټن وغزیږي چې 1،8 متره به په ځمکه کې ښخه او ډبل والی به یې ۱۲ انچه وي چې د هېواد د ځان بساینې په برخه کې به خورا ګټوره او اغېزمنه وي.
خبریال: عبدالولي عابد
عکاس: سید امید سادات