وروستی
د صنعت کارانو د ستونزو د حل په موخه کنفرانس تر سره شوه
د تلې ۱۵مه/ کابل
د افغانستان او کابل د صنایعو او کانونو خونو ریاستونو په ګډه همغږۍ د صنعت کارانو د ستونزو اورېدو په موخه د کابل د څرخي پله اړوند د صنایعو او کانونو په خونو کې کنفرانس جوړ شو چې پکې د چاپېریال ساتنې ملي ادارې مسلکي معین انجنیر عزت الله صدیقي، د صنعت او تجارت وزیر نثار احمد غوریاني، د کابل ولایت مرستیال، د اسلامي بانک رئیس، د افعانستان او کابل د کانونو او صنایعو خونو رئیسانو، د کابل ولایتي شورا رئیس، د برېښنا ریاست د عملیاتي څانګې رئیس، د دولتي ادارو استازو او صنعتکارانو په ګډون، کابو ۳۵۰ تنو کډون کړی وو.
په دغه کنفرانس کې لوړپوړو دولتي چارواکو د پانګونې د پرمختک، په هېواد کې د صنعت د ودې، د صنعت په برخه کې د شته ستونزو او د حل لارو چارو په تړاو هر اړخیزې ویناوې وکړې او د همکارۍ ژمنه یې وکړه.
د چاپېریال ساتنې ملي ادارې مسلکي معین د دا ډول برنامو ستاینه وکړه او د صنعت وده یې د هېواد د اقتصادي پرمختګ لپاره اړینه وبلله او پر چاپېریال یې د صنعت د اغېزو او ستونزو لکه: خاورې، اوبو، هوا او غږ ککړتیا را منځته کیدو او په ښارونو، کرنیزو ځمکو او سمندرونو پر غاړو د صنعتي فعالیتونو جوړېدل، د اوبو او انرژۍ مصرف هغه ستونزې یادې کړې چې چاپېریال ترې اغېزمن کیږي.
ښاغلي صدیقي وویل: د جوازو په ورکړه کې ځنډ، د فساد شتون، پر وخت د چاپېریالي چارو نه څارل او ارزونه هغه ستونزې دي چې صنعت کاران او پانګوال ورسره مخ دي. ده ژمنه وکړه چې د چاپېریال ساتنې ملي ادارې په دې برخه کې ډیر اصلاحات راوستوي او لا د اصلاحاتو په هڅه کې ده.
نوموړي له صنعت کارانو او پانګوالو وغوښتل چې د چاپېریال ساتنې په مختلفو برخو لکه د فاضلابو د تصفیه خانو د جوړیدو، د جامدو زبالو، د زرغونو یا شنو انرژیو او تکنالوژیو په برخه کې پانګوونه وکړي. ده په اړوندو ادارو غږ وکړ، چې د صنعت د ودې لپاره باید د صنعتي پارکونو لپاره زېربناوې جوړې او اسانیاوې ورته برابرې شي.
د صنعت کارانو استازو هم وینا وکړه او د برېښنا، سړکونو او صنعتي فابریکو د جوړولو لپاره یې د ځمکو نه شتون یې لویې ستونزې وبللې او په دې برخه کې یې د اړوندو ادارو د ځانګړې پاملرنې او همکارۍ غوښتنه وکړه.