وروستی
د ۱۳۹۹کال پر مالي کړنو بیا کتنه وشوه او د مالي سرچینو په اغېزمن مصرف ټینګار وشو
د چاپېریال ساتنې ملي ادارې د مالي او اداري چارو معین محمد یوسف حمیدیان په ریاست، د ۱۳۹۹ مالي کال د فعالیتونو د ارزونې په تړاو فوق العاده غونډه ترسره شوه چې پکې د دې ادارې مسلکي معین انجنیر عزت الله صدیقي، د مرکزي ادارې ټولو رئیسانو ګډون کړی وو او د ستونزو، پرمختګ، د عادي او پراختیایي بودېجې د مصرف د څرنګوالي ( د تخصیص له پړاو نیولې تر تدارکاتي چارو بشپړیدو او د حوالو تر اجرا کېدو) پر پړاوونو بیاکتنه او ارزونه وشوه.
په پیل کې د دې ادارې د مالي چارو رئیس عبدالنصیر رحیمي د عادي او پراختیایي بودیجې په معلوماتي پریزنټېشن وړاندې کړ.
ورپسې ښاغلي حمیدیان د قرنطین او کورونا وبا ستونزو ته اشاره وکړه او زیاته یې کړه: د سږني کال د مالي کړنو بیا کتنه او ارزونه باید داسې وي چې شفافیت، اغېزمنتوب او د افغانستان د چاپېریال کټې پکې خوندې او د چاپېریال ساتنې لپاره باید روښانه لیدلوری ولري. نوموړي ټینګار وکړ چې د خلکو د ځواب ویلو او ګټورو خدماتو وړاندې کولو په برخه کې د مالي اجرااتو ارزونه، د 1400 مالي کال پر پلانونو مستقیمه اغېزه کوي، له همدې امله ټول رئیسان دنده لري چې د قانون په رڼا کې د بودیجې په مصرف کې جدي پاملرنه وکړي.
د غونډې په لړ کې د دې ادارې مسلکي معین انجینر عزت الله صدیقي خبرې وکړې او د مالي سرچینو د اغیزمنې کارونې لپاره د بشري ظرفیت پر ودې ټینګار وکړ او ټولو رئیسانو ته یې لارښوونه وکړه چې د 1400 کال د پلانونو په ترتیب کې لومړیتوبونه په پام کې ونیسي.