وروستی
د افغانستان د کلیوالي انرژۍ د مارکېټ بدلون نوښت پروژې په برخه کې د ټولو ادارو همکاري
۱۳۹۹ د تلې ۳۰ مه
د افغانستان د کلیوالي انرژۍ د مارکېټ بدلون نوښت پروژې په هکله د ښکېلو کلیدي لورو د نظر اخیستنې ناسته د تلې میاشتې په ۲۹مه نېټه د کلیوبیارغونې او پراختیا په وزارت کې، د چاپېریال ساتنې ملي اداري د پالیسۍ او نړیوالو اړیکو معین ادریس ملیار، د کلیو بیارغونې او پراختیا وزارت د پروګرامونو معین، په افغانستان کې د ملګرو ملتونو د پرمختیایي پروګرام مرستیالې، د کلیو بیارغونې او پراختیا وزارت د برنامو رییسانو او د انرژۍ سکتور د کلیدي ادارو استازو په ګډون سره تر سره شوه.
په یاده ناسته کې د چاپېریال ساتنې ملي ادارې د پالیسۍ او نړیوالو اړیکو معین ادریس ملیار د خپلو خبرو په ترڅ کې د پروژې ارزښت ته په اشارې سره وویل چې یاده پروژه د زرغون اقلیم له صندوق څخه د راتلونکو پروژو لپاره د بنسټ حیثیت لري. ښاغلي ملیار د پروژې په پلي کولو کې د خپلې ادارې د بشپړ چمتووالي د څرګندولو تر څنګ وویل چې په بریالۍ توګه د پروژې د پلي کولو لپاره اړینه ده تر څو ټولې ښکېلې ادارې نږدې همکاري ولري. همدا راز د یادې ادارې د نړۍوالو اړیو او پالیسۍ معین د خپلو خبرو په اوږدو کې وویل: د دې ته ورته پروژو پلي کول، کولی شي د اقلیمي بدلون په برخه کې ګټورې تمامې شي.
د کلیوبیارغونې او پراختیا وزارت د پروګرامونو معین، ښاغلي پوپل حبیبي، په خپله وینا کې له ټولو ادارو، په ځانګړې توګه د ملګرو ملتونو له پرمختیایي پروګرام (UNDP) او د چاپېریال ساتنې له ملي ادارې، څخه مننه وکړه چې ددې پروژې د پروپوزل په چمتو کولو کې یې رغنده رول درلود. ښاغلي حبیبي هیله څرګنده کړه چې یاده پروژه به له زرغون اقلیم صندوق څخه د لازیاتو پروژو د تر لاسه کولو پیل وي.
په افغانستان کې د ملګرو ملتونو پرمختیایي پروګرام مرستیالې، آغلې Surayo Buzurukova، د ناستې موخې ته په اشارې سره وویل چې هیله لرو تر څو د ټولو ښکېلو لورو د نظرونو له اخیستلو وروسته په نږدې راتلونکي کې د پروژې عملي کارونه پیل کړو. نوموړې د انرژۍ په سکټور کې د ملګرو ملتونو د پرمختیایي پروګرام د دوامداره ژمنې په اړه د ډاډ څرګندولو تر څنګ وویل چې اړتیا ده تر څو په راتلونکي کې د افغنستان په کلیوالي سیمو کې تر دې لا لویې پروژې د انرژۍ په برخه کې پلې شي.
وروسته، د کلیوبیارغونې او پراختیا وزارت د دوامداره انرژۍ برنامې د رئیس ښاغلي محمداجمل شینواري، د ملګرو ملتونو د پرمختیایي پروګرام د برنامو مسؤولې آغلې نیلوفر ملک او تخنیکي مشاور لخوا د کلیوالي انرژۍ د مارکېټ بدلون نوښت پروژې د شالید، موخې، مقصدونو او فعالیتونو په هکله تفصیلي معلومات ګډونوالو ته وړاندې شول او تر څنګ د ګډونوالو پوښتنو ته ځوابونه ورکړل شول.
د یادونې وړ ده چې د کلیوالي انرژۍ د مارکېټ بدلون نوښت پروژه به د کلیوبیارغونې او پراختیا وزارت له لوري، د زرغون اقلیم صندوق په مالي مرسته او د ملګرو ملتونو پرمختیایي پروګرام په تخنیکي مرسته د ۵ کلونو په موده کې پلې شي.
خبریال: عبدالولي عابد
عکاس: سید امید سادات