وروستی
د غرني پړانګ نړۍ والې ورځې په پار مطبوعاتي اعلامیه
د اکتوبر ۲۳مه نېټه د غرني پړانګ نړۍ واله ورځ ده، یاده ورځ چې د لړم له دویمې نېټې سره سمون لري له ۲۰۱۳ زیږدیز کال راهیسې د بشکیک تړون پر اساس د خلکو د عامه پوهاوي لوړولو په موخه د ۱۲ غړو هېوادونو (GESLP) له خوا لمانځل کیږي.
د چاپېریال ساتنې ملي اداره هم سږ کال په داسې حال کې د غرني پړانګ نړۍ واله ورځ لمانځي چې د غرني پړانګ او د هغه د پټنځایونو د ساتنې لپاره یې څو پروژې تر لاسه کړي دي.
· د غرني پړانګ او د هغو د پټنځایونو د ساتنې پروژه.
· د دوامداره انرژۍ، د ایکوسیستم مدیریت، له اقلیمي بدلون سره د سازښت او مبارزې پروژه.
نوموړې پروژې د واخان په ملي پارک کې پلي کیږي، همدا راز د چاپېریال ساتنې ملي ادارې د غرني پړانګ او د هغه د پټنځای د ساتنې او خوندیتوب په موخه نورستان ولایت هم د درېیم مل پارک په توګه ونوماوه.
د چاپېریال ساتنې ملي اداره د افغانستان د وحشي ژوو او ایکوسیستم د ساتني او ټولو نړۍ والو کنوانسیونونو ته د ژمنتیا په موخه له ټولو هېوادوالو او مسوولو ادارو غواړي چې د وحشي ژوو د قاچاق مخنیوی وکړي او په ساتنه کې یې خپل ملي او اسلامي مسوولیت ادا کړي.