وروستی
نوي او اصلاح شوي چاپېریالي جوازونه ګټې اخیستنې ته وړاندې شول
کابل-۱۳۹۹د لړم ۷مه
د چاپېریالي جوازونو په برخه کې د اصلاح او آسانتیا رامنځته کولو برنامې پرانیست غونډه وشوه.
په یاده غونډه کې د چاپېریال ساتنې ملي ادارې مسلکي معین انجنیر عزت الله صدیقي، د سوداګرۍ او صنعت وزارت معین عبدالکریم ملکیار، د صنعت او سوداګرۍ د فکري مالکیتونو د ثبت عمومي رییس عیسی مایار، د کانونو او صنایع خونو عمومي رییس الحاج شیرباز کمین زاده، د دولتي ادارو استازو، د کابل ګاونډیو ولایتونو د چاپېریال ساتنې رییسانو، ګڼ شمېر پانګوالو اوصنعتکارنو ګډون کړی وو.
په پیل کې د چاپېریال ساتنې مسلکي معین انجنیر عزت الله صدیقي ګډونوالو ته د ښه راغلاست تر څنگ زیاته کړه: په نړۍواله کچه چاپېریال ساتنه هغه جدي مسله ده، چې په راوروسته کلونو کې یې د نړۍ په کچه غبرګونونه درلودلي دي، چې یاده موضوع په افغانستان کې هم مهمه او اړینه بلل شوې ده.
ښاغلي صدیقي وویل: صنعت د اقتصاد، د بې وزلۍ د لهمنځه وړلو، د کار او شغل د رامنځته کېدو لپاره د نننۍ نړۍ تر ټولو مهم سکتور ګڼل کېږي او زیاته یې کړه چې د صنعت او چاپېریال تر منځ دوې اړیکې موجودې دي، لومړی د صنعتي فعالیتونو لپاره اړین او لازم توکي، مواد او انرژي د سالم چاپېریال څخه تامینېدلی شي، دویم کله چې صنعتي فعالیتونه صورت مومي نېغ په نېغه د چاپېریالي ککړتیاوو لامل کېږي؛ نو اوس باید د دې دواړو اړیکو تر منځ موږ او تاسو په ګډه، توازن او تعادل ته زمینه برابره کړو چې یوه د حل لاره یې د چاپېریالي ستونزو د کمولو په موخه د چاپېریالي جوازونو ورکول او په هغو کې د درج شویو شرایطو تطبیق دی.
ده همداراز د فساد مخنیوي په برخه کې ګډونوالو ته ډاډ ورکړ، چې د هر ډول فساد مخه یې نیولې او که بیا هم د فساد اړوند کومې پېښې سره مخ شوی، کولی شئ یاده موضوع له موږ سره شریکه کړئ، چې د حل په برخه کې یې د چاپېریال ساتنې ملي اداره د هر ډول همکارۍ لپاره ژمنه ده. ده د چاپېریالي جوازونو برنامې په برخه کې اصلاح او رامنځته شوې آسانتیا ته هم ګوته ونیوه او زیاته یې کړه، چې په دې برخه کې د لانورو اسانتیاوو رامنځته کولو په هڅه کې دي.
ورپسې د کانونو او صنایع خونو عمومي رییس الحاج شیر باز کمین زاده د صنعت کارانو په استازیتوب د چاپېریال ساتنې ملي ادارې دغه اقدام نېک ګام وباله او په دې برخه کې یې د پوره همکارۍ ژمنه وکړه، ده زیاته کړه چې د شخصي ګټو لپاره نباید چاپېریالي ګټې زیانمنې شي.
همدا راز په یاده غونډه کې د صنعت او تجارت وزارت د فکري مالکیتونو د ثبت عمومي رییس عیسی مایار د چاپېریال ساتنې د یاد اقدام هرکلی وکړ او ویې ویل چې د چاپېریال ساتنې په برخه کې پورته شوي ګامونو د قدر وړ دي او غوښتنه یې وکړه، چې د چاپېریالي جوازونو په برخه کې، چې صنعت کارانو ته د تګ راتګ سرخوږی ایجادوي، د حل په موخه له موږ سره د ډیتابیس له لارې یو ځای کېدلی شئ، چې دغه کار د یادې پروسې په برخه کې لا نور هم ګټور تمامېدلی شي.
د نوموړې برنامې په اوږدو کې د چاپېریال ساتنې ملي ادارې د تلپاتې پرختیا رییس انجنیر نقیب الله صدیقي، د چاپېریالي جوازونو د ترلاسه کولو پروسې په برخه کې د رامنځته شویو آسانتیاوو په تړاو معلوماتي پرېزنټېشن وړاندې کړ.
هېره دې نه وي چې د یادې غونډې په پای کې د ګډونوالو وړاندیزونو او پوښتنو ته ځوابونه ورکړل شول.