وروستی
په تېرو دوو ورځو کې د هواککړوونکو ۷۶ فعالیتونو څخه څارنه شوې
د لیندۍ ۴مه نېټه کابل
د چاپېریال ساتنې ملي ادارې، کابل ښاروالۍ او جنایي څېړنو ریاست د چاپېریالي چارو د څارنې ګډ ټیم د هوا ککړتیا راکمولو او مخنیوي په موخه د لیندۍ په ۲مه او ۳مه نېټه، د کابل ښار په مختلفو ناحیو کې د ۷۶ اصنافو له فعالیتونوڅخه څارنه کړې ده.
د چاپېریالي چارو ګډ ټیم د دوو ورځو د څارنې په ترڅ کې له ۵۳ فابريکو، ۶لوړپوړیزو ودانیو، ۷هوټلونو او ۴حمامونو او سقاوو څخه څارنه کړې چې له دې جملې څخه د ۱۱هوټلونو مالکینو د خپلو سونګ سیسټمونو د اصلاح په موخه لیکلې ژمنې کړې او د دوه لوړپوړیزو ودانیو د سونګ سیسټمونه چې بند شوي وو له اصلاح وروسته د بیا فعالیت اجازه ورکړل شوې ده.
د چاپېریالي چارو د څارنې ټیمونه هره ورځ د کابل ښار په مختلفو سیمو کې د فعالیتونو له څرنګوالي څخه څارنه کوي او دا لړۍ به همداسې جاري وي.
د چاپېریال ساتنې ملي اداره د ټولو اصنافو له مالکینو څخه جدي غوښتنه کوي چې خپل فعالیتونه د چاپېریالي قوانینو مطابق عیار کړي؛ کنه نو فعالیتونه به یې بند او عدلي او قضایي ارګانونو ته به معرفي شي.