وروستی
د اقلیمي بدلون په اړه انلاین ناستې ته د جمهور رئیس محمد اشرف غني د پیغام ژباړه
د بښونکي او مهربان خدای په نامه
جلالتمابانو، اغلو او ښاغلو؛
لومړی غواړم د ملګرو ملتونو سازمان سرمنشي ښاغلي ګوترېش، لومړي وزیر جانسن، جمهوررئیس مکرون، جمهوررئیس پینرا او لومړي وزیر کونته څخه د اقلیمي بدلون په اړه د نننۍ انلاین غونډې جوړولو او کوربه توب مننه وکړم. دغه غونډه پخپل وار له کاربن څخه د خوندي نړۍ لپاره یو بل مهم ګام دی.
د اقلیمي بدلونونو له نظره افغانستان د نړۍ یو تر ټولو ډېر زیانمن هیواد دی.
زموږ په هیواد کې د وچکالۍ څرخ په پام وړ ډول رالنډ شوی او په ۳۳ کلونو کې له یو ځل څخه په پنځو کلونو کې یو ځل ته راکم شوی دی. اوسمهال زموږ په هیواد کې موسمي بارانونه، د ژمي پر ځای په پسرلي کې کېږي چې د مرګونو سېلابونو او ځمکو وړلو لامل کېږي. باور دا دی چې په وروستیو څلوېښتو کلونو کې د هیواد سویل ختیځې سیمې یوه نیمه درجه زیاتې ګرمې شوې دي. په بېساري ډول د ځنګلونو لمنځه وړل، په تېرو څلوېښتو کلونوکې د جګړې یوه بله پایله ده.
افغانستان د پاکې انرژۍ د تولید او زرغون صنعت د ایجاد لپاره لوی ظرفیت لري. موږ د لمر، اوبو او باد پریمانه منابع لرو چې د سالم مدیریت په پایله کې د ۳۰۰،۰۰۰ (درې سوه زره) مېګاواټه برېښنا د تولید مجموعي ظرفیت لري.
زرغونه انرژي په افغانستان کې د زرغون صنعت د تحرک لامل کېدای شي؛ په دې برخه کې کار دوام لري. د ټاپي ګازو پایپ لاین او د کاسا زر انرژۍ لېږد په توګه سیمه ییزې پروژې د تطبیق په حال کې دي. موږ په ټول هیواد کې د ابي برېښنا د سټېشنونو د جوړولو په حال کې یوو او د لمریزو او بادي منابعو په برخه کې د هیواد ظرفیتونه ارزوو. پر دې سربېره، «زیمنس انرژۍ شرکت» سره د وروستي هوکړه لیک لاسلیک موږ ته زمینه برابروي چې په سیمه کې په مناسب قېمت د باور وړ او پایداره انرژۍ د تولید په مرکز بدل شو.
افغانستان، دقیق د اسیا په زړه کې موقعیت لري. موږ د سیمې په کچه، د ژوند چاپېریال د همکاریو په بستر د بدلېدو ظرفیت لرو. د اقلیم تغییر نه یوازې په ملي، بلکې د نړۍ په کچه یوه ستونزه ده او د دې ستونزې حل ټولیزو، سیمه ییزو او نړیوالو هڅو ته اړتیا لري.