وروستی
د کاپيسا ولایت د چاپېریال ساتنې ریاست نوې ودانۍ پرانېستل شوه
د لېندۍ ۲۶مه نېټه کاپیسا
د چاپېریال ساتنې ملي ادارې عمومي رئیس شاه زمان میوندي د لېندۍ په ۲۵مه نېټه د کاپیسا ولایت د چاپېریال ساتنې ریاست د نوې ودانۍ د پرانېستلو په موخه د لوړپوري دولتي پلاوي په ملتیا یاد ولایت سفر وکړ.
د چاپېریال ساتنې ریاست د نوې ودانۍ د پرانېستې په مراسمو کې ښاغلي میوندي، د کاپيسا والي عبدالطیف مراد، د جمهوري ریاست سلاکار مولوي احمد شاه شاکر، د اقتصاد وزارت معین نبي سروش، د دې ادارې د مالي او اداري چارو معین او سلاکارانو، د ولایتي شورا رئیس او د ولایتي ادارې کارکوونکو ګډون کړی وو.
ښاغلي میوندي د کاپیسا ولایت د چاپېریال ساتنې ریاست د نوې ودانۍ د پرانېستلو له امله ګډونوالو ته مبارکي ورکړه او د دوست هېواد هندوستان له مالي ملاتړ او د اقتصاد وزارت د تخنیکي همکارۍ څخه یې مننه وکړه او ژمنه یې وکړه چې په ټول هېواد کې به د چاپېریال ساتنې برخې ته جدي پاملرنه کوي او په ځانګړې توګه د دې ولایت د چاپېریال ساتنې او د خلکو د هوساینې لپاره به د پروژو د پلي کېدو په برخه کې هڅې کوي.
همدا راز ښاغلي مراد د چاپېریال ساتنې ودانۍ جوړول د دې ولایت د آبادۍ او پراختیا په برخه کې مثبت ګام وباله او یادونه یې وکړه چې ولایتي ادارې د متوازنې پراختیا لپاره اغېزمنې کړنې ترسره کړې دي؛ خو د دې ولایت نفوس ته په کتو دا کړنې کافي نه دي او اړینه ده چې حکومت د پروژو د تطبیق په برخه کې دې ولایت ته جدي پاملرنه وکړي.
د یادولو وړ ده چې د کاپیسا ولایت د چاپېریال ساتنې ریاست نوې ودانۍ په دوه پوړونو کې په اساسي ډول د هندوستان هېواد په مالي ملاتړ او د اقتصاد وزارت په تخنیکي همکارۍ جوړه شوې ده چې ټولټال پرې ۱۳۷ زره امریکایي ډالره لګښت راغلی.