وروستی
د چاپېریال ساتنې ملي ادارې عمومي رئیس د کاپیسا ولایت د پراختیایي کمېټې په غونډه کې ګډون وکړ
د لېندۍ ۲۶مه نېټه کاپيسا
د چاپېریال ساتنې ملي ادارې عمومي رئیس شاه زمان میوندي او ورسره پلاوي یې کاپیسا ولایت ته د خپل رسمي سفر په لړ کې د ولایت د پراختیایي کمېټې په غونډه کې برخه واخېسته. په دې غونډه کې د کاپیسا والي عبدالطیف مراد، د ولسمشر سلاکار احمد شاه شاکر، د ولایتي شورا رئیس، د دې ادارې او اقتصاد وزارت معینانو، سلاکارانو، رئیسانو او د مدني ټولنې غړو ګډون کړی وو.
د غونډې په پیل کې، ښاغلي مراد مېلمنو ته ښه راغلاست ووایه او د چاپېریال ساتنې، روغتیا او نورو سکتورونو په برخه کې د تر سره شویو دندو او فعالیتونو په اړه لازم معلومات وړاندې کړل، د کاپیسا والي په دغه ولایت کې د چاپېریالي پروژو پلي کیدل د خلکو د آرمتیا او سوکالۍ لپاره اړین وبلل او هیله یې څرګنده کړه چې په دې ولایت کې د ځنګلونو د ساتنې، د شنو ساحو پراختیا، د اوبو، وحشي ژویو او الوتونکو د ساتنې په برخه کې باید ډیرې پروژې پلې شي.
ورپسې د چاپېریال ساتنې ملي ادارې عمومي رئیس د کاپیسا له والي څخه مننه وکړه چې د پراختیایي کمیټې په غونډه کې یې ورته بلنه ورکړه، ده وویل: افغانستان د ډیرو چاپیریالي ستونزو لکه د ځنګلونو له منځه تلل، د کرنیزو ځمکو ویجاړول، اقلیمي بدلون، د هوا او اوبو له ککړتیا سره مخ دي او په دې برخه کې د ټولو خلکو او بنسټونو همکاري اړینه ده.
ښاغلي میوندي زیاته کړه: د چاپېریال ساتنې ملي اداره په دې هڅه کې ده چې د شته چاپېریالي ستنونزو خصوصاً د اقلیمي بدلون سره د سازښت او مبارزې په برخه کې له نړۍوالو مالي میکانیزمونو څخه پروژې ترلاسه او پلې کړي؛ همدا راز تر اوسه پورې په دې برخه کې ډیرې پروژې د تطبیق په حال کې دي.
د چاپېریال ساتنې ملي ادارې عمومي رئیس ژمنه وکړه چې په ۱۴۰۰ کال کې به د کاپيسا ولایت د چاپېریال ساتنې ریاست د هوا او اوبو د کیفیت د معلومولو پر دستګاوو سمبال کړي، د عامه پوهاوي د لوړولو په موخه به برنامې جوړې کړي او د شنو سیمو د پراختیا او نیالګیو کېنولو لپاره به هڅې وکړي.
همدا راز د اقتصاد وزارت معین او د ولایت د سکتوري چارو رئیسانو ګډونوالو ته د خپلو لاسته راوړنو او فعالیتونو په اړه معلومات وړاندې کړل.