وروستی
د چاپېریال ساتنې ملي ادارې د هواککړتیا د راکمولو، مخنیوي او اقداماتو په تړاو خبري کنفرانس ترسره کړ
د مرغومي ۱۰مه نېټه کابل
د چاپېریال ساتنې ملي ادارې نن چهارشنبه د مرغومي په ۱۰مه نېټه د دې ادارې د بند امیر د غونډو په تالار کې د هواککړتیا د راکمولو، مخنیوي او نوو اقداماتو په تړاو خبري کنفرانس ترسره کړ.
د دې ادارې مسلکي معین انجنیر عزت الله صدیقي په پیل کې خبریالانو ته ښه راغلاست ووایه او د هواککړتیا د زیاتوالي د لاملونو، د اړوندو ادارو د مسوولیتونو، د رسنیو او هېوادوالو د ونډې، د هوا ککړتیا راکمولو، مخنیوي او مبارزې په برخه کې د حکومت د اقداماتو په تړاو هر اړخیزه خبرې وکړې.
ښاغلي صدیقي د هوا ککړتیا نړۍوال ګواښ وباله او زیاته یې کړه: له بده مرغه د کابل ښار د هواککړتیا وضعیت ښه نه دی، دا نه د حکومت او نه هم د خلکو لپاره د منلو ده.
د چاپېریال ساتنې ملي ادارې د هواککړتیا راکمولو او مخنیوي په موخه لنډمهاله او اوږدمهاله پلانونه او طرحې چمتو کړې چې هم د وزیرانو له شورا او هم له اړوندو ادارو سره شریکې شوې دي.
د چاپېریال ساتنې ملي ادارې او کابل ښاروالۍ ګډو نظارتي ټیمونو یواځې په کابل ښار کې له ۵۵۰۰ مختلفو اصنافو څخه څارنه کړې چې په هغو کې ۸۵۰ فابریکې او ۵۸۸ لوړپوړیزه ودانۍ شاملې دي چې له دې جملې څخه ۵۰ فابریکې او ۱۷۲ مختلف اصناف چې په سونګ سیسټمونو کې یې د ډبرو سکاره او نور دود لرونکي سونګ توکي سوځول جریمه کړي او فعالیتونه یې بند شوي دي.
همدا راز د تېرو دوو کلونو په پرتله چاپېریال ساتنې ته د حکومت او هم خلکو پاملرنه خورا زیاته شوې ده.
دا په داسې حال کې ده چې د تېر کال په پرتله د هوا ککړتیا کچه يو څه راښکته شوې ده.
د چاپېریال ساتنې ملي ادارې مسلکي معین له رسنیو غوښته وکړه چې د هواککړتیا په اړه کوم ناسم معلومات چې د ایرویژول سایټ لخوا نشریږي د هغو له خپرولو ډډه وکړي؛ ځکه ایرویژول په کابل ښار کې هیڅ ډول دستګاه نه لري چې د هواککړتیا ارقام او کیفیت معلوم کړي، ده وویل: رسنۍ کولی شي په خپلو راپورونو کې د دې ادارې لخوا چې د هوا د کیفیت او څرنګوالي په تړاو کوم معلومات خپریږي له هغو څخه استفاده وکړي.
د کنفرانس په لړ کې ښاغلي صدیقي د خبریالانو پوښتنو ته هر اړخیز ځوابونه ورکړل او په چاپېریال ساتنه کې یې د رسنیو ونډه او همکاري خورا اړینه وبلله. نوموړي په خپل وروستي پیغام کې له ټولو دولتي او نادولتي سکټورونو، مدني ټولنو، علمای کرامو او له عام ولس څخه غوښتنه وکړه چې د هواککړتیا راکمولو او مخنیوي لپاره له چاپېریال ساتنې ملي ادارې سره همکاري وکړي.