وروستی
د کابل ښار د هوا ککړتیا په راکمولو کې د خبریالانو او فرهنګیانو ونډه
د مرغومي ۲۵مه نېټه- کابل
د اطلاعاتو او فرهنګ وزارت لخوا د مرغومي په ۲۵مه نېټه، د کابل ښار د هواککړتیا په راکمولو کې د خبریالانو او فرهنګیانو ونډې تر نامه لاندې یو ورځنۍ غونډه جوړه شوې وه چې پکې د چاپېریال ساتنې ملي ادارې مسلکي معین انجنیر عزت الله صدیقي، د اړوندو ادارو او رسنیو استازو ګډون کړی وو.
په پیل کې د اطلاعاتو او فرهنګ وزارت سرپرست محمد طاهر زهیر وینا وکړه او د هواککړتیا، اقلیمي بدلون، د ځمکې لاندې اوبو ککړتیا او پلاستیک یې د چاپېریال لپاره جدي ستونزې وبللې.
ښاغلي زهیر د هوا ککړتیا پټه سونامي وبلله او ټینګار یې وکړ چې د هواککړتیا په تړاو باید پراخ تبلیغات او عامه پوهاوی ترسره شي؛ ترڅو خلک یې له اضرارو خبر او د راکمولو او مخنیوي لپاره ټول په ګډه لاس په کار شي.
د چاپېریال ساتنې ملي ادارې مسلکي معین انجنیر عزت الله صدیقي له هوا ککړتیا سره مبارزه د ټولو هېوادوالو او اړوندو ادارو ټولنیز مسوولیت وباله، د اړوندو ادارو پر مسوولینو، رسنیو او هېوادالو یې غږ وکړ چې د هواککړتیا په راکمولو او مخنیوي کې له دې ادارې سره همکاري وکړي.
وموړي له رسنیو غوښتنه وکړه چې د عامه پوهاوي په لوړولو کې باید رغنده ونډه واخلي.
ښاغلي صدیقي وویل: د کابل ښار د هوا ککړتیا راکمولو او مخنیوي لپاره پنځه کلن پلان جوړ شوی چې د تطبیق په برخه کې یې د اړوندو ادارو او خصوصي سکتور همکاري فوق العاده اړینه ده.
د اطلاعاتو او فرهنګ وزارت د نشراتو معین عبدالمنان شیوای شرق هم وینا وکړه او د هواککړتیا راکمولو په برخه کې سیاسي، ټولنیزه او فرهنګی اراده اړینه وبلله.
د باختر اطلاعاتي اژانس او دولتي ورځپاڼو رئیسانو هم له هواککړتیا سره د مبارزې په برخه کې د مطبوعاتو او رسنیو د ښکېلتیا او اهمیت په تړاو خبرې وکړې او ژمنه یې وکړه چې په ټولو دولتي ورځپاڼو کې به چاپېریالي موضوعات، پیغامونه او مقالې خپروي.
د اطلاعاتو او فرهنګ وزیر او د نشراتو معین د خلکو د عامه پوهاوي لوړولو په برخه کې د هر راز همکارۍ ټټر وواهه او ژمنه یې وکړه چې د هواککړتیا سره د مبارزې په برخه کې به نه ستړې کېدونکې هلې ځلې کوي.