وروستی
په چاپېریال ساتنه کې د امنیتي ځواکونو رول تر عنوان لاندې د سرتیري ملي ورځ ولمانځل شوه
۱۳۹۹کال د کب ۱۰مه نېټه کابل
د چاپېریال ساتنې ملي ادارې لخوا نن یک شنبه د کب په ۱۰مه نېټه د یوې لویې غونډې په ترڅ کې د سرتیري ملي ورځ ولمانځل شوه، په دې محفل کې د دې ادارې چارواکو او د امنیتي او دفاعي ځواکونو غړو ګډون کړی وو.
د دې ادارې عمومي رئیس شاه زمان میوندي د هېواد ټولو زړورو او باعزته امنیتي او دفاعي ځواکونو ته چې د هغوی په موجودیت کې خلک د آرامۍ او هوساینې احساس کوي؛ د سرتیري ملي ورځې مبارکي ورکړه او زیاته یې کړه: "تاسو اتل ځواکونه چې د وطن، غیرت، د خلکو د عزت او د نظام د ساتنې لپاره د جګړې په لومړۍ کرښه کې مبارزه کوئ؛ یوازې یوه ورځ نه، بلکې هره ورځ زموږ په زړونو کې یاست، ستاسو سرښندنې او قربانۍ هیڅکله د هېرولو نه دي"
ښاغلي میوندي د دې ادارې د کارکوونکو مسوولیت د امنیتي ځواکونو په څېر وباله او ویې ویل: لکه څنګه چې امنیتي او دفاعي ځواکونه د خاورې او نظام د ساتنې لپاره جنګیږي او زموږ امنیت ساتي؛ د چاپېریال ساتنې ملي ادارې کارکوونکي هم د چاپېریال (خاورې، هوا، اوبو، ځنګلونو او ایکوسیستم) د ساتنې لپاره دنده ترسره کوي.
همدا راز د امنیتي مسوولینو په استازیتوب جنرال شیراحمد انوار د چاپېریال ساتنې ملي ادارې له مشرتابه څخه مننه چې د امنیتي ځواکونو ملاتړ کوي ده وویل: "موږ په کلکه د وطن او د افغانانو د عزت د ساتلو لپاره خپله دنده ترسره کوو.
ورپسې د دې ادارې سلاکار سید میثم احساني وویل: امنیتي ځواکونو پایښت په دې کې دی چې له سیاسي، ګوندي او توکميزو مسایلو څخه بې طرفه او خپلواک وي، ده وویل: "مدني فعالانو په کلیزه کې د دې ورځې د ثبت لپاره ډیرې هلې ځلې کړې دي.