وروستی
د ملي دفاع وزارت سرپرست هم د نيالګيو کېنولو ملي کمپاین ملاتړ وکړ
۱۳۹۹کال د کب ۱۵مه- کابل
د چاپېریال ساتنې ملي ادارې عمومي رئیس شاه زمان میوندي د نیالګیو کېنولو ملي کمپاین د ښه پلي کېدو په موخه له وزیرانو او لوړ پوړو دولتي چارواکو سره د خپلو لیدنو په لړ کې پرون ( پنجشنبه د کب ۱۴مه) د ملي دفاع وزارت له سرپرست شاه محمود میاخېل سره وکتل.
په پيل کې ښاغلي میوندي د نیالګیو کېنولو ملي کمپاین په تړاو د جمهوري ریاست عالي مقام د حکم د اهميت، د ټول هېواد په کچه د ۲۵ميليونه نيالګيو کېنولو تطبیقي پلان په پلي کيدو کې د امنیتي سکتورونو د ونډې او همدا راز د بهرنيو او داخلي ځواکونو په نظامي اډو کې د زبالو او کثافاتو د مدیریت په هکله خبرې وکړې.
ښاغلي میاخیل د چاپېريال ساتنې ملي ادارې مشرتابه او ورسره پلاوي هرکلی وکړ او د نیالګیو کېنولو ملي کمپاین او چاپېريال ساتنې په تړاو يې د دې ادارې کړنې وستايلې.
د ملي دفاع وزارت سرپرست د نيالګيو کېنولو ملي کمپاین ملاتړ وکړ او د بهرنيو او کورنيو ځواکونو په اډو کې يې د زبالو او کثافاتو د مدیریت او چاپيريالي حفظ الصحې ته د نه پاملرنې په هکله خپله اندېښنه څرګنده کړه او ژمنه يې وکړه چې د دې ستونزې د حل لپاره به د تاميناتو او لوجستیک معینیت ته لارښوونه وکړي.
د منظور شوي پلان پر اساس به سږ کال د دولتي ادارو لخوا د ټولنې مختلفو اقشارو په همکارۍ په ټول هیواد کې ۲۵ میلیونه نیالګي کینول شي چې د ځنګلونو او شنو بوټو په ساتنه کې د امنیتي ځواکونو همکاري خورا اړينه ده.
د يادولو وړ ده چې دنيالګيو کېنولو ملي کمپاین د ښه تطبیق لپاره به له لوړپوړو دولتي چارواکو سره د چاپېريال ساتنې ملي ادارې عمومي رئيس لیدنې او کتنې دوام ولري.
هرا فغان یوه ورځ یو نیالګی
د سولې او ښېرازۍ نیالګی