وروستی
د چاپېریال ساتنې ملي ادارې لخوا د ښځو نړۍواله ورځ ولمانځل شوه
۱۳۹۹کال د کب ۱۸مه کابل
د چاپېریال ساتنې ملي ادارې لخوا نن (دوشنبه د کب ۱۸مه) د دې ادارې د کول حشمت د غونډو په تالار کې د ښځو نړۍواله ورځ ولمانځل شوه.
په دې مراسمو کې د دې ادارې عمومي رئیس شاه زمان میوندي، مالي او اداري چارو معین محمد یوسف حمیدیان، د نظارت، پلان او پالیسۍ معین ډاکټر حسیب پایاب، رئیسانو او ټولو ښځینه کارمنو ګډون کړی وو.
په پیل کې د چاپېریال ساتنې ملي ادارې عمومي رئیس شاه زمان میوندي د ګډونوالو هرکلی وکړ او ټولو مېرمنو ته یې د ښځو نړۍوالې ورځې په مناسبت مبارکي ورکړه. ده وویل: په چاپېریال ساتنه کې د ښځو ونډه خورا با ارزښته او کلیدي ده؛ ځکه ښځې د ټولنې اساس جوړوي، له چاپېریالي ستونزو او د اقلیمي_بدلون له ناوړه اغېزو څخه لومړی همدوی اغېزمنې کیږي.
ښاغلي میوندي وویل: د اقلیمي بدلون او چاپېریالي ستونزو سره د مبارزې په برخه کې ښځو تل له نارینهوو سره په ګډه کار کړی او د تېرو څو لسیزو په لړ کې یې د جګړو له امله ډیرې ستونزې ګاللې دي؛ نو موږ باید جدي مبارزه وکړو چې د ټولنې په هره برخه کې د ښځو حقونه خوندي وساتل شي.
نوموړي په تېرو شلو کلونو کې د ښځو د مشارکت او پرمختګ په برخه کې د افغان دولت لاسته راوړنې وستایلې، د دې وطن مېرمنې یې اتلانې وبللې او له ښځو یې غوښتنه وکړه چې د نیالګیو_کېنولو_ملي_کمپاین کې همکاري وکړي.
ورپسې د دې ادارې د جنډر آمرې آغلې نادرې رشیدي ګډونوالو ته د مبارکۍ ترڅنګ د دې ادارې د جنډر برخې د فعالیتونو او لاسته راوړنو په هکله معلوماتي پرزنټېشن وړاندې کړ.
د لمانځغونډې په لړ کې د دې ادارې د مشرتابه لخوا ۲۰ تنه ښځینه کارمنې په درېیمه درجه تقدیرپاڼو او ۶۵ نورې هغه د ډالیو په ورکولو و نازول شوې.
د پروګرام په پای کې د ادارې د کارپوهانو (انجنیر آریا او سمیرا سالک) لخوا د اقلیمي بدلون سره د مبارزې په برخه کې د ښځو د ګډون، د اقلیم_زرغون_صندوق او نړۍوالو مالي میکانیزمونو په تړاو معلوماتي پرزنټېشنونه وړاندې شول.
خبریال: عبدالولي عابد
عکاس: سید امید سادات