وروستی
د ارشاد، حج او اوقافو وزير: علمای کرام به د نیالګیو کېنولو ملي کمپاین کې پراخه ونډه اخلي
۱۳۹۹کال د کب ۲۱مه کابل
د نیالګیو کېنولو ملي کمپاین په دوام نن (د کب ۲۱مه) د ارشاد، حج او اوقافو او چاپېریال ساتنې ملي ادارې په ګډه همکارۍ د حاجیانو په مجتمع کې د نیالګیو په کېنولو سره په جوماتونو او مدرسو کې د نیالګیو کېنولو ملي کمپاین رسماً پیل کړ.
په دې مراسمو کې د چاپېریال ساتنې ملي ادارې عمومي رئیس شاه زمان میوندي، د ارشاد، حج او اوقافو وزیر محمد قاسم حلیمي، د دې وزارت معینانو، رئیسانو او د کابل ښار د بېلابیلو جوماتونو او تکیه خانو ملاامانو ګډون کړی وو.
د غونډې په پيل کې ښاغلي حلیمي د دیني ارشاداتو له پلوه د نیالګیو کېنولو، ساتنې او پالنې په هکله وینا وکړه او زیاته یې کړه: د انسان د پیدایښت فلسفه همدا ده چې ځمکه اباد کړي؛ نو ځکه خو اشرف المخلوقات او په ځمکه کې د الله تعالی له لوري خلیفه ټاکل شوی.
نوموړي پر خلکو غږ وکړ چې نیالګي کېنوي، ساتنه او پالنه وکړي؛ ځکه په دې کار کې هم دنیوي او هم اخروي ښېګڼې او ثواپ نغښتی.
ورپسې د چاپېریال ساتنې ملي ادارې عمومي رئیس شاه زمان میوندي تېرې څو لسیزې جګړې د هېواد د شنو سیمو، طبیعي سرچینو او چاپېریالي وضعیت د خرابیدو لامل وبللې او زیاته یې کړه: موږ ته اړینه ده چې ټول په ګډه یو ملي خوځښت رامنځته کړو، شین انقلاب جوړ کړو او د یوه سمسور او ښېرازه افغانستان لپاره هڅې وکړو، د دې کار لپاره اړتیا ده چې د دولتي ادارو او خصوصي سکتور سربېره علمای کرام هم باید د چاپېریالي فرهنګ په ترویج کې رغنده رول ولوبوي او خلک د نیالګیو کېنولو، ساتنې او پالنې ته و هڅوي.
د پروګرام په لړ کې درې تنو ګلالیو ماشومانو ته چې یوه یې قران کریم حفظ کړی و، د فضیلت پګړۍ ور په سر او دوه تنه نور یې د ډالیو په ورکولو ونازول شول او یاد مراسم د څو دانو نیالګیو په کېنولو پای ته ورسېدل.
هرا فغان یوه ورځ یو نیالګی
د سولې او ښېرازۍ نیالګی