وروستی
د رحمان بابا په عالي لېسه کې د سولې او ښېرازۍ په نوم نیالګي کېنول شول
۱۳۹۹کال د کب ۲۶مه کابل
د چاپېریال ساتنې ملي ادارې او سرحدونو، قومونو او قبایلو چارو وزارت په ګډه همکارۍ د نیالګیو کېنولو ملي کمپاین په درشل کې نن سه شنبه د کب په ۲۶مه د رحمان بابا په عالي لېسه کې د سولې او ښېرازۍ په نوم نیالګي کېنول شول.
په همدې مناسبت شانداره مراسم جوړ شوي وو چې پکې د چاپېریال ساتنې ملي ادارې عمومي رئیس شاه زمان میوندي، د سرحدونو، قومونو او قبایلو چارو وزیر محب الله صمیم، د دې ادارې مسلکي معین انجنیر عزت الله صدیقي، رئیسانو، استادانو او زده کوونکو ګډون کړی وو.
د پروګرام په پیل کې د سرحدونو، اقوامو او قبایلو چارو وزیر محب الله صمیم د چاپېریال ساتنې د ارزښت په هکله وینا وکړه او پر زده کوونکو یې غږ وکړ چې د هېواد په ښېرازۍ او سمسورتیا کې پراخه ونډه واخلي.
ورپسې د چاپېریال ساتنې ملي ادارې عمومي رئیس شاه زمان میوندي د هېواد په سمسورتیا او ښېرازۍ کې د ځوانانو او ګلالیو زدهکوونکو ونډه خورا اغېزمنه او باارزښته وبلله او دوی یې د سولې او سمسورتیا سفیران وبلل.
ښاغلي میوندي تېرې څو لسیزو جګړې د هېواد د چاپېریالي وضعیت د ویجاړتیا لامل وبللې او ویې ویل چې د دې حالت د بدلون لپاره باید ټول په ګډه یو ملي خوځښت رامنځته کړو، زرغون انقلاب جوړ کړو او د یوه سمسور او ښېرازه افغانستان لپاره کار وکړو.
د چاپېریال ساتنې ملي ادارې عمومي رئیس د رحمان بابا عالي لیسې له زده کوونکو وغوښتل چې په دې ملي پروسه کې برخه واخلي او د نیالګیو ساتنې او پالنې ته جدي پاملرنه وکړي.
د یادولو وړ ده چې سږ کال به په ټول افغانستان کې ۲۵ میلیون نیالګي کېنول شي او د دې چارې د تطبیق لپاره د دولتي ادارو، خصوصي سکتور او خلکو تر منځ قوي همغږي رامنځته شوې ده او یواځې د کب ۲۰مه چې د نیالګیو کېنولو ملي ورځ وه، په ټول هېواد کې د ۳۸زره کسانو په ګډون ۴۵۰ څخه زیات د نیالګیو کېنولو ملي کمپاینونو په لړ تر ۶سوه زرو څخه زیات نیالګي کېنول شوي دي.
هر افغان یوه ورځ یو نیالګی
د سولې او ښېرازۍ نیالګی