وروستی
د کیمیاوي موادو او زیان اړوونکو زبالو په اړه ښوونيز ورکشاپ تر سره شو
د وري ۱۹مه کابل
د کیمیاوي موادو او زیان اړونکو زبالو په سکتور کې د چاپیریال ساتنې مدیریت د غوره مېتودونو په اړه د روان کال د وري په ۱۵ او ۱۶مو نېټو، په پارک سټار هوټل کې دوه ورځنی ښوونيز ورکشاپ ترسره شو.
په دغه ورکشاپ کې د دې ادارې د تلپاتې پراختيا رييس انجنير نقيب الله صديقي، د يادې ادارې کارکوونکو، په افغانستان کې د ملګرو ملتونو د چاپېريال ساتنې پروګرام د کمياوي پروژو هماهنګ کوونکي، جمال باور او د دولتي ادارو استازو ګډون کړی وو.
په پيل کې ښاغلي صدیقي ګډونوالو ته د ښه راغلاست تر څنګ د کمياوي موادو او زيان اړوونکو زبالو په اړه خبرې وکړې زياته يې کړه: دا چې د انسانانو ژوند د کمياوي موادو له کارونې پرته نيمګړی دی؛ خو تر څنګ يې بېرته د انسانانو او حيواناتو ژوند ته په لوی ګواښ هم بدليدلای شي چې د دې ګواښ د مخنيوي لپاره تر ټولو اړينه ده چې د کیمياوي موادو او زبالو مديريت ته پاملرنه وشي او عملي پلانونه پلي شي. ده وويل چې افغانستان د څلورو نړيوالو کمياوي کنوانسيونونو غړيتوب لري؛ نو پدې اساس د کمياوي موادو سوداګرو ته اړينه ده چې د خپلو کمياوي سوداګريزو شرکتونو اسناد د نړيوالو کمياوي کنوانسيونونو د قانون او مقرراتو اړوند معياري او جوړ کړي.
ورپسې د يادې ادارې کارکوونکي رحمت الله رفيع او د ملګرو ملتونو د چاپېريال ساتنې پروګرام د کمياوي پروژو هماهنګ کوونکي، جمال باور د کمياوي موادو، زيان اړوونکو زبالو او له هغې څخه د ګټې اخيستنې او مديريت په اړه معلوماتي پرېزېنټېشنونه وړاندې کړل.
د ياد ورکشاپ په اوږدو کې د ګډونوالو تر منځ بحث تر سره شو، د ګډونوالو پوښتنو او وړانديزونو ته ځوابونه ورکړل شول.
هېره دې نه وي چې د ياد ورکشاپ په پای کې د د دغه ورکشاپ ګډونوالو ته ستاينليکونه ووېشل شول.