وروستی
احمد حسیب پایاب د اقتصاد وزارت له مسلکي معین سره ولیدل
د وري ۲۹ مه کابل
د چاپېریال ساتنې ملي ادارې د پالیسۍ، پلان او نظارت معین ډاکټر احمدحسیب پایاب د اقتصاد وزارت د مسلکي معینیت له سرپرست نبي سروش سره د دواړو ادارو تر منځ د همغږۍ د پیاوړتیا په موخه د هغه په کاري دفتر کې وکتل.
دواړو لورو د اقتصاد، چاپېریال ساتنې او همدارنګه د افغانستان د تلپاتې پراختیا او سترو اهدافو په تړاو بحث وکړ.
په پیل کې ښاغلي سروش د افغانستان د تلپاتې اهدافو په برخه کې د ملګرو ملتونو لپاره د دویم ملي راپور د چمتو کولو په اړه خبرې وکړې او د چاپېریال ساتنې ملي ادارې څخه یې په دې په برخه کې د همکارۍ غوښتنه وکړه.
ورپسې احمد حسیب پایاب د چاپېریال ساتنې په اړه هر اړخیزې خبرې وکړې او زیاته یې کړه: که له یوه اړخه اقتصاد د یوه هېواد د پرمختګ او ودې لپاره اړین دی؛ خو له بله اړخه مهمه ده چې د هېواد د اقتصادي موخو، پلانونو او په ستراتیژیو کې چاپېریالي اغېزو ته پاملرنه وشي، تر څو چاپېریال او چاپېریال ساتنه له پېښېدونکو ګواښونو سره مخ نه شي.
ښاغلي پایاب د اقتصاد وزارت له رهبرۍ څخه غوښتنه وکړه چې له دغې ادارې سره د تلپاتې پراختیا (SDGs) د چاپېریالیزو شاخصونو په پلي کولو د څارنې او ارزونې سیستمونو جوړولو په برخه کې تخنیکي مرسته وکړي.
ډاکټر پایاب د چاپېریال ساتنې په برخه کې د غیر دولتي موسسو (NGOs) په اړه د معلوماتو غوښتنه وکړه او تر څنګ یې په (COP26) نړۍوال کنفرانس کې د هېواد لا موثر ګډون په پار چې په سکاټلنډ هېواد کې ترسره کېږي د لازم چمتووالي هیله وښوده.
هېره دې نه وي چې د دغې لیدنې په پای کې دواړو لورو د یادو ادارو تر منځ په ستراتیژیکو چارو او د ملي پلانونو په پرخه کې د همکارۍ ژمنه وکړه.