وروستی
په ملي کچه د ټاکل شوې ونډې د سند (NDC) په هکله د جندر د رول په تړاو غونډه وشوه
د غویي ۹مه کابل
د چاپېریال ساتنې ملي ادارې لخوا د دې ادارې د بند امیر د غونډو په تالار کې په ملي کچه د ټاکل شوې ونډې د سند (NDC) په هکله د جندر د رول په تړاو غونډه وشوه چې پکې د اړوندو ادارو کابو ۴۰ تنو ګډون کړی وو.
په پیل کې د دې ادارې د اقلیمي بدلون رئیس روح الله امین په ملي کچه د ټاکل شوې ونډې د سند او د هېواد د چاپېریالي وضعیت په اړه وینا وکړه. ده وویل: اوسمهال اقلیمي بدلون یو نړۍوال ګواښ دی چې زموږ هېواد یې هم اغېزمن کړی، وروستۍ وچکالۍ، د هوا ګرموالی، سیلابونه او بې وخته ورښتونه د اقلیمي بدلون ښکاره بېلګي دي. افغانستان د اقلیمي بدلون نړۍوال کنوانسیون ته ژمن دی او هر پنځه کاله وروسته باید په ملي کچه د ټاکل شوې ونډې سند باندې بیا کتنه وکړي او نوموړي کنوانسیون ته يې واستوي. که څه هم په مخکیني سند کې د جندر ونډه روښانه نه وه په همدې موخه نننۍ ناسته رابلل شوې؛ تر څو د جنډر ونډه او رول روښانه شي. ده په ګډونوالو غږ وکړ چې خپل نظرونه دې له ادارې سره شریک کړي.
ورپسې د AKAH دفتر استازي محمد علي نظري په ملي کچه د ټاکل شوې ونډې د سند په اړه معلومات ورکړل او ویې ویل چې د دې سند د بیا کتنې پروژه به د شپږو میاشتو په اوږدو کې د روان میلادي کال د مې میاشتې تر پایه بشپړه شي.
د کلیو بیا رغونې او پراختیا وزارت سلاکارې ناجیه خروټې وویل: که څه هم افغانستان په اقلیمي بدلون کې کومه ونډه نه لري خو د اقلیمي بدلون له ګڼو ګواښونو سره مخ دی؛ نو اړوندې ادارې او وزارتونه باید د دې ګواښونو د را کمولو لپاره په ګډه کار وکړي.
د غونډې په لړ کې د ښځو چارو وزارت او نورو اړوندو ادارو استازو د خپلو نظرونو په وړاندې کولو سره په دې سند کې د ښځو ونډه مهمه وبلله او په دې هکله یې د ښځو د ظرفیت په لوړلو باندې ټینګار وکړ. د AKAH دفتر د جندر چارو کارپوه محبوبې ابوي هم د اقلیمي بدلون او په ملي کچه د ټاکل شوې ونډې په سند کې د ښځو د رول د څرنګوالي په اړه معلوماتي پرزنټېشن وړاندې کړ.
د غونډې په پای کې د ګډونوالو پوښتنې ځواب او یاده غونډه د ګروپي کارونو په ترسره کولو پای ته ورسېده.
خبریال: عبدالولي عابد
عکاس: سید امید سادات