وروستی
د بند امیر ملي پارک لپاره د نوي تفصیلي پلان په اړه بحث ترسره شو
۱۴۰۰کال ، د غویي ۱۱مه کابل
د چاپېریال ساتنې ملي ادارې مسلکي معین او سرپرست انجنیر عزت الله صدیقي د بامیانو له والي سید اعلی رحمتي سره د بند امیر ملي پارک لپاره د بندا میر د تفصیلي پلان چې د ښار جوړنې او اراضۍ ریاست لخوا جوړ شوی دی، ویډیویي کنفرانس له لارې بحث وکړ.
په پیل کې د بامیانو والي سید اعلی رحمتي، بند امیر ملي پارک کې سیاحینو ته د د اسانتیا لپاره د نوي تفصیلي پلان په اړه هر اړخیز معلومات وړاندې کړل.
ورپسې د دې ادارې مسلکي معین او سرپرست انجنیر عزت الله صدیقي د بامیانو له والي مننه وکړه چې د دې ادارې لیدلوري ته یې لومړیتوب ورکړ، ده زیاته کړه: بند امیر د هېواد په کچه لومړنی ملي پارک دی چې په دې باید سترګې پټې نه شي. ده همدا راز د بند امیر ملي پارک د طبیعي ارزښت، ظرفیت، اقتصادي اهمیت او تخنیکي اړخ په هکله مفصلې خبرې وکړې او زیاته یې کړه، ملي پارک د نړۍوالو معیارنو په پام کې نیولو سره ټاکل کیږي او نوی پلان هم باید د یادو معیارونو په پام کې نیولو سره پلی شي، ده همدا راز زیاته کړه چې د ساتل شویو سیمو طبیعي ښکلا باید د تفریحي ښکلا ښکار نه شي.
ښاغلي صدیقي وویل چې موږ د تلپاتې پراختیا مانع نه یو؛ خو هغې پراختیا ته لومړیتوب ورکوو، چې تلپاتې او په راتلونکو کې د ستونزو سبب نه شي، ده په دې تړاو وویل چې په کم وخت کې به تخنیکي ټېم یاد ولایت ولېږل شي او د یاد ولایت له تخنیکي ټېمونو سره به د نوموړي پلان په اړه هر اړخیز او تخنیکي کار وکړي.