وروستی
د کيمياوي موادو او زيان اړونکو زبالو د سوداګرۍ د کنټرول په تړاو دوه ورځنی ښوونيز ورکشاپ ترسره شو.
د جوزا ۴مه، کابل
د چاپېريال ساتنې ملي ادارې د تلپاتې پراختيا رياست له لوري په افغانستان کې د ملګرو ملتونو د چاپېريال ساتنې پروګرام په تخنيکي همکارۍ، د کيمياوي موادو او زيان اړونکو زبالو د سوداګرۍ د کنټرول په تړاو دوه ورځنی ښوونيز ورکشاپ ترسره شو، په دغه ورکشاف کې د يادې ادارې د تلپاتې پراختيا رييس انجنير نقيب الله صديقي، د دغې ادارې او اړوندو دولتي ادارو استازو او خصوصي سکټور غړو ګډون کړی و.
په پيل کې ښاغلي صديقي ګډونوالو ته ښه راغلاست تر څنګ د کمياوي موادو او زيان اړونګو زبالو د سوداګرۍ په تړاو خبرې وکړې زياته يې کړه: د ورځني ژوند د ستونزو د مخنيوي لپاره د کيمياوي موادو په کارولو سره نبايد خپل او راتلونکی ژوند له ستونزو سره لاس او ګرېوان کړو، ده په خپلو خبرو کې زياته کړه چې افغانستان د نړيوالو کنوانسيونونو غړيتوب لري؛ نو په دې اساس د کيمياوي موادو او زيان اړونکو زبالو سوداګرو ته اړينه ده، چې خپله سوداګري د چاپېريال ساتنې او نړيوالو کنوانسيونونو دقانون مطابق معياري کړي. ښاغلي صديقي د خصوصي سکټور، کورنيو چارو وزارت او اړوندو وزارتخانو او دولتي ادارو له استازو غوښتنه وکړه، چې په دې برخه کې فعاله او رغنده ونډه واخلي او پرې نه ږدي چې کيمياوي مواد او زيان اړونکې زبالې په غير قانوني توګه سوداګري او قاچاق شي.
ده همدا راز زياته کړه چې د چاپېريال ساتنې ملي اداره د هېواد په کچه مسوليت لري چې د کيمياوي موادو په برخه کې خپلې هلې ځلې جاري وساتي او د پېښدونکو او اړوونکو زيانونو مخنيوی وکړي.
ورپسې د يادې ادارې او په افغانستان کې د ملګرو ملتونو د چاپېريال ساتنې پروګرام د غړو له لوري ګډونوالو ته ښوونيز پرېزنټېشنونه وړاندې شول، بحث تر سره شو او د ګډونوالو وړانديز او پوښتنو ته ځوابونه وويل شول.
هېره دې نه وي چې د دغه ښوونيز ورکشاپ ګډونوالو ته ستاينليکونه هم ورکړل شول.