وروستی
ډاکټر احمد حسيب پاياب په افغانستان کې د فورټېسکيو اسټراليايي شرکت له ځانګړي استازي سره وکتل
د غبرګولي۹مه کابل
د چاپېريال ساتنې ملي ادارې د پلان، پاليسۍ او نظارت معين ډاکټر احمد حسيب پاياب پرون (د غبرګولي په ۸مه نېټه) د بېلابېلو چاپېريالي مسايلو او د ادارې د ملاتړ په پار په افغانستان کې د فورټېسکيو اسټراليايي شرکت له ځانګړي استازي ښاغلي ذبيح زماني سره په خپل کاري دفتر کې وکتل. په دې لیدنه کې تر هر اړخیز بحث وروسته دواړو لورو د همغږۍ او همکارۍ پر پياوړتیا ټینګار وکړ.
د دې ادارې د پلان، پاليسۍ او نظارت معين ښاغلي زماني ته ښه راغلاست ووايه، ورپسې دواړو لورو د چاپېريال ساتنې پر اهميت، د نوموړي شرکت په لويو پروژو کې چاپېريالي مسایلو ته لومړيتوب ورکول، د چاپېریال ساتنې په برخه کې د ماسټرۍ او دوکتورا تر کچې بهر ته د ادارې د کارکوونکو استول، د کارکوونکو د ظرفیت لوړول، د چاپېریال ساتنې په برخه د څېړنو تر سره کول، د هېوادوالو د عامه پوهاوي په برخه د پروګرامونو جوړول او نورو اړينو چاپېريالي مسايلو باندې خبرې وکړې او يو بل ته يې د همکارۍ ډاډ ورکړ.
د یادونې وړ ده چې له نوموړي شرکت سره د افغان حکومت لخوا د برېښنا د توليد، د کانونو د کېندنې، کرنې او صنعت په برخه کې د پانګونې هوکړه لیک شوی او په نورو هېوادونو کې د زرغون اقتصاد په برخه کې کار کوي او د چاپېريالې ساتنې ملي ادارې سره به یې همکاري خورا اړینه او د هېواد لپاره ګټوره وي.