وروستی
د چاپېریال ساتنې ملي ادارې مشرتابه لخوا د دولسو ساتل شوو ساحو سندونه لاسلیک شول
د غبرګولي ۱۲مه کابل
د چاپېریال ساتنې ملي ادارې مشرتابه لخوا پرون (سه شنبه د غبرګولي ۱۱مه) د دولسو ساتل شوو ساحو رسمي سندونه لاسلیک شول.
یادې ساحې د پکتيا منډهیر، د خوست ادمامد، د لوګر د ازرې طبيعي ځنګلونه، د فاریاب ګرزيوان، د سمنګان کول بست او کول رحمت، د ميدان وردګو د شاه فولادي غره دويم فيز، د ننګرهار دره نور، د لغمان د دولت شاه طبيعي ځنګلونه، د کاپيسا رېګ روان، د کنړ شمندوک او د دايکندي شهرستان سيمې دي چې تر اړوندې سروې او مطالعې وروسته يې د ساتل شوو ساحو په توګه رسمي اسناد لاسليک شول او ډېر ژر به د پرتمينو مراسمو په لړ کې په رسمي توګه اعلان شي.
د چاپېريال ساتنې ملي ادارې عمومي رئيس شاه زمان ميوندي د دوولسو ساتل سويو ساحو د سندونو د لاسلیک پر مهال وویل: د ساتل شوو ساحو پراختيا د نړۍوالو همکاريو د جلبولو، علمي څېړنو، د ګرځندويانو راجلبولو او د ملي اقتصاد په پیاوړتیا کې ډېر زیات ارزښت لري.
د ده په وینا؛ د ساتل شوو ساحو په اعلانولو له يوې خوا کولى شو چې له طبيعي سرچينو څخه اړينه ګټه واخلو او له بلې خوا راتلونکو نسلونو ته روغ چاپېريال په ميراث پرېږدو.
د چاپېريال ساتنې ملي ادارې عمومي رئیس د خپلو خبرو په دوام کې ټينګار وکړ چې موږ ژمن وو؛ ترڅو د ٢٠٢٠ کال تر وروستيو د افغانستان د ټولې خاورې لږ تر لږه ٥ سلنه د ساتل شوو ساحو په توګه اعلان کړو او خوښ يم چې نن تر ټاکل شوي هدف وړاندې تللي يو.
د چاپېريال ساتنې ملي ادارې مشرتابه دا چاره د طبيعي سرچينو او چاپېريال ساتنې په برخه کې ستر ګام ګڼي او د دولسو ساتل شوو ساحو د سندونو د لاسلیک له امله د افغانستان ولس او د دولت مشرتابه ته مبارکي وايي.