وروستی
په ملي کچه د ټاکل شوې ونډې (NDC) سند د بیاکتنې په تړاو مشورتي ورکشاپ ترسره شو
د غبرګولي ۱۳مه- کابل
د چاپېریال ساتنې ملي ادارې لخوا د آغاخان د مسکن جوړولو مؤسسې په تخنيکي او مالي همکارۍ په ملي کچه د ټاکل شوې ونډې (NDC) سند د بیاکتنې په موخه د دې ادارې د بند امیر د غونډو په تالار کې ۴ورځنی مشورتي ورکشاپ جوړ شوی و چې نن (د غبرګولي په ۱۳مه) پای ته ورسېده. په دغه مشورتي ورکشاپ کې د اړوندو دولتي ادارو او نړیوالو موسسو کابو ۵۰ تنو استازو ګډون کړی وو.
د ورکشاپ په پیل کې د دې ادارې د اقلیمي بدلون رئیس روح الله امین د (NDC) سند د اهمیت په اړه وینا وکړه او زیاته یې کړه: موږ د دې سند د بیاکتنې په ورستي پړاو کې یو چې له نېکه مرغه په دې برخه کې اقدامات ترسره شوي دي او یاد سند به د مشورو او په ملي کچه د لومړیتوبونو په پام کې نیولو سره د پاریس تړون په اساس چمتو شي.
ښاغلي امین وویل: د ملګرو ملتونو د اقلیمي بدلون کنوانسیون غړو هېوادونو د راپور په اساس اوسمهال په اوسط ډول د نړۍ تودوخه دوو درجو ته پورته شوې چې دا باید 1.5 درجې ته راټېټه شي. افغانستان هم د اقلیمي بدلون نړیوال کنوانسیون غړی دی او اړ دی چې هر پنځه کاله وروسته دې کنوانسیون ته خپل راپور ورکړي.
په ملي کچه د ټاکل شوې ونډې سند د بیاکتنې په پار د 2020 کال د ډسمبر په 3مه نېټه د مشورتي ورکشاپونو لړۍ پیل شوې وه چې تر اوسه پورې د کابل په شمول د هېواد په څلورو زونونو کې مشورتي ورکشاپونه ترسره شوي دي چې د ګډونوالو نظرونه، وړاندیزونه او د هیواد په کچه د اقلیمي بدلون په برخه کې د ملي لومړیتوبونو په پام کې نیولو سره به یاد سند چمتو او د اقلیمي بدلون ملي کمېټې او د ولسمشر له تائیدۍ وروسته د اقلیمي بدلون نړیوال کنوانسیون ته و استول شي.
که ټول هېوادوال، خصوصاً قدرمن متخصصین او اکاډمیک بنسټونه د چاپېریال ساتنې ملي ادارې سره مخلصانه همکاري وکړي او نړیوالو مالي میکانیزمونو ته کره، جامع او دقیقې طرحې چمتو او وړاندې کړي؛ نو لرې نه ده چې هر کال به یوازې د ځنګلونو د بیا رغولو، د ژوند بڼو او وحشي ژوو د ساتنې او له اقلیمي بدلون سره د سازښت په برخه کې په سلګونو میلیونه ډالره مرستې ترلاسه کړي.
یاد ورکشاپ د ګډونوالو د نظرونو، وړاندیزونو او نیوکو ته د (ARUP) موسسې همکارانو لخوا چې د یاد سند د چمتو کولو او بیاکتنې تخنیکي چارې یې پر غاړه دي؛ د ځوابونو په ورکولو سره پای ته ورسېده.