وروستی
د طبیعي منظرو انځوریز نندارتون او د چاپېریال نړیوالې ورځې لمانځل
د چنګاښ ۲مه کابل
په کابل ژوبڼ کې نن د روان کال د چنګاښ په ۲مه نېټه د طبیعي منظرو، ژوندبڼو او ملي پارکونو نندارتون جوړ شوی و چې په لړ کې یې د چاپېریال نړیواله اونۍ هم ولمانځل شوه.
په دغه نندارتون او لمانځغونډه کې د چاپېریال ساتنې ملي ادارې مسلکي معین انجنیر عزت الله صدیقي او د دې ادارې کارکوونکو، د کرنې، اوبو لګولو او مالدارۍ وزارت د طبیعي سرچینو رئیس محمد رفیع قاضي زاده، د کابل ژوبڼ مسوول، د پوهنتون استادانو او رسنیو استازو ګډون کړی وو.
په پیل کې د کابل ژوبڼ مسوول وویل: په کابل ژوبڼ کې د مختلفو حیواناتو د ساتنې ترڅنګ، له ورکېدا او ګواښ سره مخ حیواناتو څخه نسل اخیستنه او روزل کیږي او بېرته طبیعت ته خوشي کیږي. نوموړي ګډه همغږۍ او عامه پوهاوی د ټولنې اړتیا وبلله او ټینګار یې وکړ چې د ایکوسیستم، ځنګلونو او حیواناتو د ساتنې لپاره باید کار وشي.
انجنیر عزت الله صدیقي د دې ادارې مسلکي معین، د چاپېریال نړیوالې ورځې او اونۍ د اهمیت په هکله وینا وکړه، ایکوسیستم، طبیعي منظرې او ژوند بڼې یې خورا مهمې وبللې. ده وویل: د دوی اهمیت په کتو د ملګرو ملتونو لخوا پوره یوه لسیزه د ایکوسیستم په نامه نومول شوې ده.
ښاغلي صدیقي د طبعیي منظرو، ملي پارکونو، ژوند بڼو او ځنګلونو پر ساتنه ټینګار وکړه او چاپېریال ساتنه یې د ټولو مسوولیت وباله.
د کرنې وزارت د طبیعي سرچینو عمومي رئیس محمد رفیع قاضي زاده هم وینا وکړه او ایکوسیستم یې یوه کلیدي موضوع وبلله چې ټول سکتورونه پکې دخیل دي.
یاد پروګرام د هېواد د طبیعي منظرو او حیواناتو له انځوریز نندارتون په لیدلو سره پای ته ورسیده.
د یادولو وړ ده چې د چاپېریال نړیواله ورځ د غبرګولي ۱۵مه وه او دې ادارې یې د تېرو کلونو په څېر د شاندارو مراسمو د جوړیدا تابیا کړې وه؛ خو د کورونا مرګونې وبا له امله یاده ورځ په مرکز کې و نه لمانځل شوه، البته په ډیرو ولایتونو کې د چاپېریال نړیواله ورځ او اونۍ د مختلفو برنامو په ترڅ کې ولمانځل شوې.