وروستی
د چاپېریال ساتنې ملي ادارې عمومي رییس د خصوصي سکتور سره د همغږۍ او همکارۍ پر پراختیا ټینګار وکړ
د چاپېریال ساتنې ملي ادارې د رهبرۍ ناسته د چاپېریال ساتنې ملي ادارې د عمومي رییس پښتون عاطف تر مشرۍ لاندې ترسره شوه.
په دغه ناسته کې چې د دې ادارې معینانو او رییسانو هم ګډون درلود، د چاپېریالي ستونزو په حل لارو، له دولتي ادارو او خصوصي سکتور سره د همکارۍ او همغږۍ پر پراختیا خبرې وشوې.
د چاپېریال ساتنې ملي ادارې عمومي رییس وویل: هغه سکتورونو ته د خدماتو وړاندې کول چې د جوازونو په برخه کې اړتیا لري؛ یوه مهمه او جدي اړتیا ده، ټول مرکزي او دویمي واحدونه مسولیت لري چې د خصوصي سکتور لپاره وړ او پر وخت خدمتونه وړاندې کړي. ده په خپلو خبرو کې خصوصي سکتور د دولت لوی همکار او ملاتړ وباله او ویې ویل چې په فعالیتونو کې یې باید د قوانینو پلي کېدل او چاپېریالي معیارونه په پام کې ونیول شي.
ښاغلي عاطف زیاته کړه: ټولې برنامې باید د چاپېریالي ګواښونو په پام کې نیولو سره کره او د علمي معلوماتو په رڼا کې جوړې شي او له هر اړخیزې څېړنې او ارزونې وروسته له اړوندو څانګو سره شریکې شي.
د چاپېریال ساتنې ملي ادارې عمومي رییس لارښوونه وکړه چې د هوا ککړتیا او اداري فساد سره د مبارزې، او د خلکو لپاره د خدمتونو وړاندې کولو او پیشرفت لپاره د مشابه دندو مخنیوي لپاره مهم تدابیر له لاس کې ونیول شي.
ده د اطلاع رسوونې عامه پوهاوي په برخه کې د ظرفیتونو قوي کېدو ته په اشارې له ټولو ښاراوسېدونو، علماوو، رسنیو، خصوصي سکتور او مدني فعالانو و غوښتل چې د چاپېریال ساتنې په برخه کې چې د راتلونکو نسلونو لپاره پاکه وظیفه ده، له چاپېریال ساتنې ملي ادارې سره همکاري وکړي.