وروستی
په دولتي او شخصي روغتونونو کې د طبي زبالو د لهمنځه وړلو او تفکیک پر غوره مدیریت ټینګار وشو
د زمري ۱۰مه- کابل
د طبي زبالو د تنظیم کمېټې دویمه غونډه د چاپېریال ساتنې ملي ادارې مسلکي معین انجنیر عزت الله صدیقي په مشرۍ ترسره شوه چې پکې د کمېټې ټولو غړو ګډون کړی وو.
ښاغلي صدیقي ګډونوالو ته ښه راغلاست ووایه او جمهوري ریاست ته یې د دې کمېټې د کړنو د راپور وړاندې کولو په هکله معلومات ورکړل او زیاته یې کړه چې جمهوري ریاست د دې کمېټې د کړنو راپور غوښتی و چې له چمتو او وړاندې کولو وروسته د جمهوري ریاست لخوا د عامې روغتیا وزارت او دې ادارې ته جدي سپارښتنې کړې دي.
د دې ادارې مسلکي معین د طبي زبالو کمېټې له ټولو غړو وغوښتل چې د جمهوري ریاست د سپارښتنو او طبي زبالو مقررې د پلي کېدو په موخه دې موثرې برنامې او فعالیتونه تنظیم کړي؛ ترڅو د کمېټې کړنې مو مثبتې پایلې ولري.
د غونډې په لړ کې د طبي زبالو د تنظیم او څارنې د تګلارې په هکله معلومات وړاندې شول او د یادې تګلارې د بشپړولو په تړاو د کمېټې غړو خپل نظرونه او وړاندیزونه وړاندې کړل.
د غونډې په پای کې د طبي زبالو د تنظیم او څارنې په تګلاره کې د ګډونوالو د نظرونو او وړاندیزونو د اوډلو په صورت کې یاده تګلاره د کمېټې د غړو لخوا په پرنسیب ډول تائید شوه.
همدا راز د تولیدي او لهمنځه وړونکي سکتور، د سرغړوونکو د نغدي جریمې، په روغتونونو کې د طبي زبالو د څرنګوالي، د چاپېریالي جواز لیکونو اخیستل او د زبالو د سوځولو لپاره د یو لړ تخنیکي مسایلو د وضعکولو په تړاو لازمې پرېکړې وشوې.