وروستی
د نورستان په ځنګلونو کې د اور لګېدنې په تړاو
د چاپېریال ساتنې ملي ادارې اعلامیه
د ذوالقعدې ۲مه نېټه- کابل
له پرون راهیسې په ټولنیزو رسنیو کې ضدو نقیص راپورونه خپاره شوي چې د نورستان ولایت په ځنګلونو کې له څو ورځو راهیسې اور لګېدلی او ډیر ځنګلونه یې سوځولي دي او لامل یې هم د سیمه ییزو چارواکو تر منځ د ځنغوزیو پر سر شخړه ښودل شوې ده. د چاپېریال ساتنې ملي اداره د دې اعلامیې په خپرولو سره دغه آوازې په کلکه ردوي.
د نورستان ولایت د دوو ولسوالیو په ځنګلونو کې اور لګېدلی و چې د یاد ولایت د چاپېریال ساتنې سرپرست مولوي تاج الدین په وینا (په ځنګل کې د یوه شپون ماشوم لخوا اور بل شوی و او د هغه د بې غورۍ له امله نور ځنګل ته هم خور شو او د ځنګل ځېنې برخې یو سوځولي دي).
د نورستان ولایت په واما او نورګرام ولسوالیو کې چې کومو ځنګلونو اور اخیستی و، د ولایتي ادارې په لارښوونه د اړوندو ولسوالیو د ولسوالانو په مشرۍ د دوی پرسونل، د چاپېریال ساتنې،کرنې او مالدارۍ ریاستونو کارکوونکو، مجاهدینو او ولسي خلکو پر وخت سره سيمې ته ځان رسولی او د هغوی د نه ستړې کېدونکو هڅو او زیار په پایله کې اوس د واما ولسوالۍ د بوني ځنګل اور لله الحمد وژل شوی دی.
همدا راز د نورګرام ولسوالۍ کې د اور وژنې او مهارولو لپاره د مرستیال والي شيخ زرمحمد په مشرۍ مجاهدینو او ولسي خلکو د اور د مهار او وژنې لپاره هڅې وکړې او همدارنګه د ننګرهار ولایت د اطفایې ریاست عمله او اړونده وسایل هم د اور وژنې لپاره ورغوښتل شوي وو چې د اور په مهارولو او وژنه کې کافي پرمختګ شوی او اور په کنټرول کې دی.
د یادونې وړ ده چې یاده اور لګېدنه په هغو سیمو کې رامنځته شوې چې د مرکزي ساحو څخه لېرې او لوړې دي چې د اطفایې د موټرو او وسایلو ورتګ ناشونی دی.
ځنګلونه چې د هېواد ملي شتمني ده، نه یواځې چې د افغانستان لپاره خورا ګټور او با اهمیته دي بلکې په نړۍوال اقلیمي بدلون او د کاربن ډای اکسايډ په جذبولو کې د پام وړ ونډه لري.
د چاپېریال ساتنې ملي اداره له ټولو نړۍوالو چاپېریالي بنسټونو څخه غواړي چې د نورستان ولایت جغرافیایي موقعیت او پراخه ځنګلونو ته په کتو، راتلونکي کې د اور لګېدنې پېښو د مخنیوي او مهارولو لپاره د اور وژنې عصري وسایلو همکاري وکړي او هغه سیمې چې له پخوا تخریب او سوزېدلي دي په بیاځلي رغونه او د ځنګلونو په احداث کې یې مرسته وکړي.