وروستی
د چاپېريال نړيوالې ورځې اعلاميه
۱۴۰۱ل کال د غبرګولي ۱۵مه- د ۱۴۴۳ق کال د ذی القعدې ۵مه نېټه
د غبرګولي ۱۵ مه نېټه چې د 2022 میلادي کال د جون له 5مې نېټې سره سمون لري د چاپېریال نړیواله ورځ ده چې په ډیرو هېوادونو کې د شاندارو مراسمو په ترڅ کې لمانځل کیږي. افغانستان هم نړیوالو چاپېریالي تړونونو ته د پوره ژمنتیا او نړیوال کلي د غړي په توګه هر کال یاده ورځ لمانځي.
سږ کال د ملګرو ملتونو لخوا د چاپېریال نړیوالې ورځې لپاره (یواځې یوه ځمکه - Only one earth) شعار ټاکل شوی چې موږ به یې په خپل هېواد کې (یوه ځمکه لرو، باید په سمه توګه یې ساتنه وکړو) شعار تر عنوان لاندې ولمانځو.
ځمکه د شمسي نظام یوازینۍ سیاره ده چې د اکسیجن په درلودلو سره پکې ژوند او ژواک شونی دی، الله تعالی ځمکنې عناصر د انسان او نورو مخلوقاتو لپاره د رزق سرچینه ګرځولې ده، خاوره یې د مختلفو نباتاتو د زرغونیدو وړ ګرځولې او غرونه یې د ورښتنونو د ذخیره کولو او د ځمکنۍ کُرې د ثبات لپاره پیدا کړي دي.
اوسمهال د صنعت او ټکنالوژۍ د چټک پرمختګ له امله ځمکه او په ځمکه کې ژوند له زیاتو ننګونو سره مخ دی، انسان د نورو ژوندیو موجوداتو په څېر د خپل ژوندانه د تېرولو (خوراک، څښاک او نورو اړتیاوو د پوره کولو) او خپلې بقا لپاره ځمکې ته اړتیا لري.
که موږ ټول په دې باور لرو چې چاپېریال، ونې او بوټي، شین اسمان، دنګ غرونه، رڼې او پاکې اوبه، ټول الله زموږ انسانانو او نورو ژوندیو مخلوقاتو د ژواندانه او ښېګڼې لپاره پیدا کړي دي؛ نو بیا خو باید د الله تعالی د دې نعمتونو شکر ادا کړو د خپلې ځمکې او چاپېریال ساتنه او پالنه وکړو.
موږ ته پکار ده چې له ککړتیا سره مبارزه وکړو، خپل چاپېریال پاک وساتو، سمسورتیا او ښکلا ته یې پاملرنه وکړو او له ټولو هغو توکو نه لکه (یو بار مصرفه پلاستیکي څېزونه) چې زموږ چاپېریال او ځمکه ککړوي او راتلونکي کې موږ ته جدي ستونزې او ګواښونه زیږوي، له استفادې یې ډډه وکړو.
د چاپېریال په ککړتیا سره اوبه، هوا او خاوره ټول ککړیږي چې له دې لارې زموږ غذایي زنځیږ زیانمن کیږي او دا بیا د انسانانو پر روغتیا ډیرې ناوړه اغېزې ښندي او خطرناکې ناروغۍ پیدا کوي.
خاوره هغه با ارزښته سرچینه ده چې د انسان د خوراکي توکو 96 سلنه اړتیاوې پوره کوي، د سالمې خاورې په نه شتون کې به د ځمکې په کُره کې ژوند له جدي ستونزو سره مخ شي، له بده مرغه اوسمهال ورځ تر بلې ځمکه د خطرناکو پلاستیکي توکو په هدیره بدلیږي چې دا به په راتلونکي کې ناوړه او خطرناکه پایلې ولري.
د چاپېريال ساتنې ملي اداره له ټولو قدرمنو هيوادوالو، علمای کرامو، د پوهنتون، ښوونځيو او مدرسو استادانو، په ځانګړې توګه د دولتي او خصوصي رسنیو له مسوولینو غواړي چې د چاپېریال ساتنې په هکله خلکو ته پوهاوی ورکړي او خلک وهڅوي چې د یوه پاک او ښېرازه چاپېریال لپاره خپلې مټې را ونغاړي او خپل ملي او ایماني مسوولیت ادا کړي.
د چاپېريال ساتنې ملي اداره