وروستی
د چاپېریال ساتنې ملي ادارې مشرتابه د چاپېریال پوهنځي له رئیس او استادانو سره وکتل
۱۴۴۳کال د ذولقعدې ۱۵مه - کابل
د چاپېریال ساتنې ملي ادارې سرپرست حافظ عزیزالرحمن او پالیسي او مسلکي معین ډاکټر زین العابدین عابد پرون دوشنبه د ذالقعدې په ۱۴مه نېټه د کابل پوهنتون د چاپېریال پوهنځي له رئیس پوهندوی محمد داوود شېرزاد او ځینو استادانو سره ولیدل.
د چاپېریال ساتنې ملي ادارې عمومي رئيس د استادانو هرکلی وکړ او ویې ویل: چاپېریال ساتنه یواځې د دې ادارې مسوولیت نه دی بلکې د ټولو بنسټونو، اړوندو ادارو او ټولو هېوادوالو ګډ مسوولیت دی او په ځانګړې توګه د چاپېریال ساتنې پوهنځې استادان موږ ته له ځانګړي اهمیت څخه ځکه برخمن دي چې مسلکي کدرونه روزي. که په یوه اداره کې مسلکي او تعلیمیافته افراد و نه ګومارل شي؛ نو هغه اداره به په خپلو چارو کې بریالۍ نه وي او نه به د ترقۍ او پرمختګ پر لور ګامونه واخلي.
د دې ادارې عمومي رئیس د چاپېریال پوهنځي له رئیس او استادانو و غوښتل چې د دې ادارې د پرمختګ لپاره په مختلفو برخو کې موږ ته سلا مشورې راکړي او په ځانګړي ډول د چاپېریالي جوازونو د وېش پروسې په ساده کولو کې دې خپلې نظریې له موږ سره شریکې کړي.
د چاپېریال پوهنځي رئیس پوهندوی محمد داوود شېرزاد د یاد پوهنځي د تاریخچې په هکله معلومات ورکړل او زیاته یې کړه: په ۱۳۸۸ کال کې د چاپېریال ساتنې ډیپارټمنټ د بنسټ ډبره اېښودل شوې او په ۱۳۹۲ کال کې یې پوهنځي ته ارتقا وکړه. ده وویل: د چاپېریال ساتنې پوهنځي درسي کریکولم د امریکا، هند او څو نورو هېوادونو د درسي کریکولم، د وخت د اړتیاوو او د مارکیټ د غوښتنو په پام کې نیولو سره چمتو شوی دی.
همدا راز د چاپېریال ساتنې ملي ادارې پالیسي او مسلکي معین ډاکټر زین العابدین عابد د دې ادارې د راتلونکو پلانونو او اقداماتو په هکله معلومات ورکړل او ویې ویل: موږ په هره برخه خصوصا د بنسټ جوړونې په برخه کې عملي کارونه پیل کړي دي، پخوا په دې اداره کې ځینې کارکوونکي د شناخت او واسطې او همدا راز د رشتې خلاف مقرر شوي دي. نوموړي ژمنه وکړه چې په راتلونکي کې به د آزاد رقابت له د چاپېریال پوهنځي فارغینو ته په دې اداره کې د کار زمینه برابره کړي.
د یادونې وړ ده چې په دې غونډه د ادارې د ټولو برخو رئیسانو هم ګډون کړی وو، دواړو خواوو د همکارۍ او همغږۍ د لا پیاوړتیا په موخه د یوه ګډ تفاهم لیک په رامنځته کېدو ټینګار وکړ.