وروستی
د بابا غره په لمنو کې د ملي پارکونو د طبیعي ښکلاګانو انځویز نندارتون جوړ شو
1_1658565476.gif)
۱۴۴۳ کال د ذی الحجې ۲۴مه- میدان وردګ
د میدان وردګو ولایت د لومړۍ حصې بهسودو ولسوالۍ اړوند بابا غره په لمنو کې د ۱۴۴۳کال د ذی الحجې په ۲۲مه نېټه د میدان وردګو ولایت د اطلاعاتو او فرهنګ او چاپېریال ساتنې ریاستونو په ګډه همکارۍ دودیزه فرهنګي میله جوړه شوې وه چې پکې د محلي ادارو مسوولینو، ګاونډویو ولایتونو او شاوخوا سیمې اوسېدونکو په شمول په سلګونو تنو هېوادوالو ګډون کړی وو.
د یادې میلې په لړ کې د خلکو د عامه پوهاوي لوړولو په موخه د افغانستان د دریوو ملي پارکونو (نورستان، واخان او بند امیر) طبیعي ښکلاګانو انځوریز نندارتون جوړ شوی وو او خلکو ته د چاپېریال ساتنې ملي ادارې د عامه پوهاوي ټیم لخوا د مخلتفو چاپېریالي مسایلو په هکله معلومات ورکړل شول.
د میدان وردګو ولایت د چاپېریال ساتنې رئیس مولوي الله محمد ذاکر د اسلام له نظره د چاپېریال ساتنې د اهمیت په هکله وینا وکړه او له خلکو یې وغوښتل چې چاپېریال ساتنې ته جدي پاملرنه وکړي.
د یادونې وړ ده په تېرو شلو کلونو کې دا لومړی ځل دی چې د هېواد په کچه په یوه لېرې پرته ولسوالۍ کې په پوره ډاډمنه او باامنه فضا کې داسې فرهنګي میله ترسره شوه.
د چاپېریال ساتنې ملي اداره له قدرمنو هېوادوالو غواړي چې د ملي پارکونو، ساتل شویو سیمو، طبیعي ښکلاګانو ځنګلونو او وحشي ژویو په ساتنه کې خپل ملي او اسلامي مسوولیت ادا کړي.