وروستی
د اقلیم بدلون نړیواله اونۍ په خوست ولایت کې ولمانځل شوه
د اقلیمي بدلون د نړیوالې اونۍ په مناسبت د خوست په ولایت کې د دولتي ادارو کارمندانو لپاره لومړی درې ورځینی ورکشاپ د چاپېریال ساتنې ملي ادارې لخوا او د ملګرو ملتونو د چاپېریال پروګرام (UNEP) په همکارۍ دایر شو او نن يې په څلورمه ورځ د اقلیمي بدلون نړیواله اونۍ د خوست په شیخ زاید پوهنتون کې ولمانځل شوه، چې پکې د ولایت مقام استازي، د شیخ زاید پوهنتون استادانو، محصلينو، د دولتي ادارو رئیسانو او د علماوو شورا رئیس ګډون کړی وو. په پیل کې د خوست ولایت د چاپېریال ساتنې رئیسې نادرې هیلې وینا وکړه او په خپلو خبرو کې یې پر چاپېریال ساتنه باندې هر اړخیزې او مفصلې خبرې وکړې او د اقلیمي بدلون موضوع یې اړینه وبلله. ورپسې د شیخ زاید پوهنتون سرپرست رئیس ښاغلي پوهنمل محمد شفیق مندوزي او د عامې روغتیا ریاست مرستیال محترم ډاکټر ګل محمدین محمدي د چاپېریال ساتنې او د اقلیم بدلون په اړه هر اړخیزې ویناوې وکړې او دا ډول غونډې یې ګټورې او مهمې وبللې او همدارنګه د خوست د علماوو شورا رئیس مولوي محترم شاه محمود محمدي د چاپېریال ساتنې او اړونده موضوع ګانو د ارزښت په اړه عالمانه وینا وکړه او د چاپېریال ساتنې په اړه یې الهي احکام او احادیث تلاوت کړل او د چاپېریال ساتنه یې د ټولو ګډ مسؤلیت وګاڼه. د پروګرام په بله برخه کې د چاپېریال ساتنې د ملي ادارې څخه راغلي پلاوي او د کابل پوهنتون استاد پوهنمل محترم محمد داود شېرزاد لخوا د اقلیمي بدلون په اړه ترتیب شوي معلوماتي پرېزېنټیشنونه وړاندې شول او په وروستیو شېبو کې د پوهنتون محصلينو له لوري پوښتنې وشوې چې د ښاغلي شېرزاد لخوا قانع کوونکي او مسلکي ځوابونه ورته وویل شول او یاد کنفرانس په افغانستان کې د پاک او سالم چاپېریال او د تل پاتې سولې په دعا سره پای ته ورسید.