په چک ولسوالۍ کې به ۴۰۰۰ نیالګي کېنول شي

۱۴۴۴کال د رمضان ۷مه/ میدان وردګ
د میدان وردګو ولایت د چاپېریال ساتنې ریاست په همغږۍ د سوېډن کمېټې د وردګ سیمه ییز دفتر لخوا د چک ولسوالۍ په روغتیایي او ښوونیزو مرکزونو، عامه ځایونو او د چک بند/ کانال ته څېرمه د زرغون او سمسور چاپېريال رامنځته کېدو په موخه د ۴ زره زینتي نیالګیو کېنولو کمپاین پیل شو .

د نیالګیو کېنولو په دې مراسمو کې د اړوند ولایتي ادارو مسوولینو، د سویډن کمېتې استازو، د چک ولسوالۍ مسوولینو، دیني علماوو او ولسي وګړو ګډون کړی وو.
د میدان وردګو ولایت د چاپېریال ساتنې رئیس مولوي الله محمد ذاکر او د سیندیزې حوزې رئیس د نیالګیو کېنولو په دیني، طبي او اقتصادي ارزښت هر اړخیزې خبرې وکړې اوزیاته  یې کړه چی د چاپېریال ساتنې او نیالگیو کېنولو په اړه یې خلکو ته له بېلابېلو لارو په کافي اندازه عامه پوهاوی ورکړی دی؛ ترڅو د هیواد دسمسورتیا او ترقۍ لپاره نیالگي کینوي او ساتنه او پالنه یې وکړي .
د نیالګیو کېنولو پر مهال د سویډن کمېټې سیمه ییز مسوول وویل، یاد نیالګي د ولسونو له غوښتنې او اړتیا سره سم کېنول کیږي چې د ساتنې او پالنې لپاره یې هم ځانګړی پلان جوړ شوی او په دې برخه کې یې د مسوولینو او ولسونو همکاري اړینه وبلله.

د چک ولسوال د سوېډن کمېټې له مسوولینو مننه وکړه او د دوی دا نوښت او اقدام یې د هېواد د زرغونتیا او ښېرازۍ لپاره ارزښتمن ګام وباله او پر ولس یې غږ وکړ چې له موجوده فرصته په استفادې، د هېواد د سمسورتیا او آبادۍ لپاره تر خپلې وسې په کور، کلي او بانډو کې زیات شمېر مثمره او غیر مثمره نیالګي کېنوي.
د نیالګیو کېنول، ساتنه او پالنه د هېوادوالو ملي او ایماني مسوولیت دی او ولس باید په دغه برخه کې خپله همکاري ونه سپموي.

د یادونې وړ ده چې سږ کال به د میدان وردګو ولایت په کچه د دولتي او خصوصي سکتور پر مټ د ولایت د زرغونتیا او سمسورتیا په موخه تر یو مېلیون زیات نیالګي کېنول شي.

Mar 29, 2023