وروستی
د ژوند بڼو ملي ستراتیژۍ د ارزونې په هکله درې ورځنی مشورتي ورکشاپ پیل شو
۱۴۴۴کال
د شوال ۱۹/ کابل
د چاپېریال ساتنې ملي ادارې له خوا نن د ۱۴۰۲کال د ثور په ۱۹مه نېټه د دې ادارې د کول
حشمت خان د غونډو په تالار کې د ژوند بڼو ملي ستراتیژي او د عمل پلان مسودې د
وروستۍ ارزونې په هکله درې ورځنی مشورتي ورکشاپ پیل شو.
په دې مشورتي ورکشاپ کې د چاپېریال ساتنې ملي ادارې مشرتابه، رئیسانو، متخصصینو، د
وحشي ژوو د ساتنې (WCS)
موسسې رئیس او متخصصینو، د کابل پوهنتون استادانو او د اړوندو ادارو استازو ګډون کړی
وو.
غونډه د قران عظیم الشان د مبارکو آیتونو په تلاوت پیل او ورپسې د دې ادارې د
مسلکي او پالیسي چارو معین ډاکټر زین العابدین عابد د ګډونوالو هرکلی وکړ او زیاته
یې کړه: په افغانستان کې د څو لسیزو جګړو له امله نه یوازې انسانان بلکې حیوانات
هم ډیر زیات اغېزمن شوي دي چې د جګړې په دوران کې له هېواد څخه په تېښته کې وو؛ له
نیکه مرغه د اسلامي امارت په راتګ سره په هېواد کې امنیت راغلی او اوس ژوي هم
خوندي دي.
ښاغلي عابد د (WCS) موسسې څخه مننه وکړه چې د چاپېریال ساتنې
ملي ادارې سره همکاري کوي. نوموړي ګډونوالو ته سپارښتنه وکړه چې په پوره غور سره د
ژوند بڼو ملي ستراتېژۍ د غني کولو لپاره ګډ کار وکړي.
د دې ادارې د طبیعي میراثونو د ساتنې رئیس حامد صافي د ژوند بڼو د اهمیت او ارزښت
په هکله معلوماتي پرزنټېشن وړاندې کړ او د ژوند بڼو شتون او ایکوسیستمونو ساتنه یې
اړینه وبلله.
په افغانستان کې د (WCS)
موسسې د پروګرامونو رئیس ډاکټر سټیفن وویل: افغانستان د ځانګړو ژوند بڼو په
درلودلو سره په نړۍواله کچه غني هېواد دی. ده وویل: په افغانستان کې (۱۵۰۰) ډوله حیوانات دي چې ډیری یې ځانګړي
او د سیمې په هېوادونو کې نشته او ساتنې ته یې باید جدي پاملرنه وشي.
نوموړي زیاته کړه: (WCS)
موسسه په سیاست کې دخیل نه ده او زموږ موخه او هدف دا دی چې له ګواښ سره مخ ایکوسیستمونو
او ژوو ساتنه وکړو.
د ورکشاپ په لړ کې د دې ادارې متخصصینو حمید الله صاحبي او دین محمد فقیري لخوا د
افغانستان د ژوند بڼو او نړۍوالو چاپېریالي کنوانسیونو په هکله هر اړخیز معلوماتي
پرزنټېشنونه وړاندې شول.
د وحشي ژوو د ساتنې موسسې اجرائیوي رئیس ایوب علوي د ژوند بڼو ملي ستراتیژي او د
عمل پلان مسودې د څرنګوالي او اهمیت په هکله وینا وکړه او له ګډونوالو یې وغوښتل چې
نظرونه دې د دې ستراتېژۍ د لا غنامندۍ لپاره د چاپېریال ساتنې ملي ادارې سره شریک
کړي.
د یادونې وړ ده چې د ژوند بڼو ملي ستراتیژي او د عمل پلان پر مسوده په ۲۰۲۰ز کال کې کار پیل او د ۲۰۲۳ز کال د جون تر میاشتې باید
بشپړ شي.