وروستی
د اقلیم بدلون نړیواله اونۍ په بلخ ولایت کې ولمانځل شوه
د اقلیمي بدلون نړیواله اونۍ د بلخ په پوهنتون کې او د چاپېریال ساتنې ملي ادارې عمومي رئیس، شاه زمان میوندي، او ورسره پلاوي په شتون کې ولماځل شوه. په دې غونډه کې د بلخ د ولایتي شورا رییس الحاج محمد افضل حدید، د بلخ پوهنتون رییس ډاکتر خلیل الله کلیوال، د انجنیرۍ او چاپېریال د پوهنځي رییس ډاکتر خپلواک، د دې علمي بنسټ استادانو، د شمالي ولایتونو د چاپېریال ساتنې رییسانو، د دې ولایت د دولتي ادارو رییسانو، د علماو د شورا استازو، مدني بنسټونو، ملي او نړیوالو بنسټونو او د بلخ پوهنتون محصلینو گډون درلود. په دې غونډه کې ښاغلي میوندي؛ په افغانستان کې د اقلیمي بدلون پایلو ته اشاره وکړه او څرگنده یې کړه؛ چې افغانستان د دې پدیدې د پایلو په وړاندې ډېر زیانمنونکی هیواد دی. هغه د تېر کال وچکالي د اقلیم د بدلون د پایلو یوه بېلگه وگڼله او ویې ویل چې دا پدیده د هیواد د چاپېریال، ټولنې او اقتصاد لپاره ستر گواښ دی. ښاغلي میوندي؛ د دې ورځې د نمانځنې موخه د اقلیم د بدلون د پایلو په وړاندې پوهاوی او گډه مبارزه وبلله، او د شته فرصتونو څخه د اغیزناکې کاراخیستنې لپاره د ټولو بنسټونو او ولس د همکارۍ غوښتونکی شو. د دې غونډې ویناوالو د دې ادارې د کړنو ستاینه وکړه او د همکارۍ ژمنه یې وسپارله. د غونډې په پایله کې؛ (له ساینس څخه تر عمل پورې) تر نامه لاندې د اقلیم د بدلون د درې ورځنۍ ښوونیزې دورې گډونوالو ته تصدیق لیکونه ووېشل شول. همدارنگه په دې کنفرانس کې د چاپېریال ساتنې عمومي رییس؛ د بلخ ولایت د ولایتي شورا رییس، د شمال زون د علماوو د شورا منشي، د بلخ پوهنتون رییس، اطلاعاتو او فرهنگ او چاپېریال ساتنې رییسانو له خوا د چپنې او لنگوټې په ورکړې وستایل شو. دا په داسې حال کې ده؛ چې ښاغلي میوندي، بلخ ولایت ته د خپل درې ورځني رسمي سفر په لړ کې د څو چاپېریالیزو پروژو څخه لیدنه هم وکړه.