په میدان وردګو کې د چاپېریال نړۍ‌واله ورځ ولمانځل شوه

۱۴۴۴کال د ذالقعدې21نېټه - میدان وردګ
د میدان وردګو ولایت د چاپېریال ساتنې ریاست د وردګ پوهنتون او د پياوړتيا لوړولو، چاپېريال ساتنې او بشري مرستو مؤسسې په همکارۍ د روان لمريز کال د غبرګولي په ۱۷ مه نیټه په وردګ پوهنتون کې د چاپېريال نړيواله ورځ د شاندارواو پرتمينو مراسمو  په ترځ کې ولمانځل شوه.

په دې غونډه کې د وردګ پوهنتون رئيس شيخ القران و الحديث مولوي صفت الله حقاني، د علمي او محصلانو چارو مرستیال پوهنیار حمید الله عمري، د مالي او اداري چارو مرستیال انجنیر ضیاء الرحمن مولوي زاده، د میدان وردګو ولايت د چاپېريال ساتنې رئيس الله محمد ذاکر او ورسره مل پلاوي، د پياوړتيا لوړولو، چاپېريال ساتنې او بشري مرستو مؤسسې مشر محمدیوسف حمدیان، د یادی موسسې معاون انجنیر عزت الله صدیقي او ورسره مسلکي ټیم، وردګ پوهنتون د اړوندو پوهنځيو رئيسانو، آمرينو، استادانو، اداري کارمندانو او محصلینو ګډون کړی وو.

غونډه د کلام الله مجيد د مبارکو ايتونو په تلاوت سره پيل او ورپسې د وردګ پوهنتون رئيس ګډونوالو  ته د ښه راغلاست تر څنګ له اسلامي اړخه د چاپېريال ساتنې پر ارزښت هر اړخیزه وينا وکړه.  ورپسې د میدان وردګو ولایت چاپېريال ساتنې رئيس مولوي الله محمد  ذاکر د چاپېريال ساتنې د موضوع په اړه بشپړ معلومات وړاندې کړل او د موضوع پر اهميت يې رڼا واچوله. د غونډې په دویمه برخه کې د پیاوړتیا لوړولو، چاپیریال ساتنې او بشري مرستو (REHA)  مؤسسې رئیس محمد يوسف حميديان  په نړيواله کچه د اقلیمي بدلون پر عواملو، او بشر ته ترې پیښیدونکو ګواښونو او په یاده برخه کې د حکومتونو مؤسساتو، چاپېریال ساتنې ملي ادارې او د هیواد د وګړو  په مسؤلیتونو اړوند معلوماتي پرزنټیشن وړاندې کړ  او په یاده برخه کې یې د منسجمو تګلارو د رامنځته کولو وړاندیز وکړ. وروسته د چاپیریال ساتنې ملي ادارې  پخواني مسلکي معین انجنير عزت الله صديقي له لوري د چاپېریال ساتنې په برخه کې د  شته فرصتونو څخه د استفادې، په پوهنتونونو کې د تحقیقاتي مراکزو د ایجاد او د چاپیریال ساتنې، اقلیمي بدلون په برخه کې د نړیوالو خاص ډول د لویو صنعتي هیوادونو په مسؤلیتونو، اړوند علمي سیمنار وړاندې کړ  یاد سمينار د ګډونوالو پوښتنو ته په ځوابونو  او د تقدير پاڼو، او ستاينليکونو په ورکولو او دعايې  په لوستلو سره پای ته ورسېده.

Jun 10, 2023