وروستی
په هلمند کې د چاپېریال نړۍواله ورځ ولمانځل شوه
۱۴۴۴کال
د ذالقعدې ۲۴مه - هلمند
د هلمند ولایت د چاپېریال ساتنې ریاست لخوا د چاپېریال نړۍواله
ورځ د پلاستيکي ککړتیا پر وړاندې د مبارزې تر عنوان لاندې په هلمند پوهنتون کې د یوې
لویې غونډې په ترڅ کې ولمانځل سوه.
په دې لمانځغونډه کې د هلمند ولایت د چاپېریال ساتنې رئیس
مولوي محمد عیسی اغا، د هلمند پوهنتون علمي مرستیال پوهنیار محمد نعیم دوست، د
پوهنتون استادانو او محصلینو، علمای کرامو او د ښاروالۍ مسوولینو ګډون کړی وو.
په پیل کې د هلمند ولایت د چاپېریال ساتنې ریاست د اطلاعاتو
او عامه اړیکو عمومي مدیر سید احمد نظري د غونډې ګډونوالو ته ښه راغلاست ووایه او
ویې وویل دا چې چاپېریال پوله او سرحد نه لري نو ټول هیوادونه مکلف دي چې د چاپېریال
ساتنې لپاره خپلې هڅې وکړي. افغانستان هم د چاپېریال ساتنې په دې برخه کې خپلې هڅې
ګړندۍ کړي همداراز نوموړي له ټولو هیوادوالو خصوصاً د هلمند له ولس څخه غوښتنه وکړه
چې د پلاستیک د مخنیوي لپاره د چاپېریال ساتنې له ریاست سره همکاري وکړي چي دا ناوړه
دود له منځه ولاړ سي.
ورپسې د هلمند ولایت د چاپيریال ساتنې رئیس محمد عیسی اغا
وویل د خپل چاپیریال پاک ساتل د هر شخص مسئولیت دی موږ باید د خپل چاپیریال پاک
ساتلو لپاره په ګډه یو له بله سره همکاري وکړو همدا راز نوموړي وویل چې د پلاستیک
پر ځای له ټوکرینو او کاغذي کڅوړو څخه باید استفاده وسي تر څو چاپیریال پاک وساتل
سي او همدارنګه به مو خپل پخوانی کلتور ژوندی ساتلی وي.
په ورستیو کي د غونډې ګډونوالو د ریاستونو رئیسانو او ادارو
مسئولینو په ګډه له یو بل سره د چاپیریال په پاک ساتلو او د پلاستیکي شیانو څخه د ځان
ساتلو او له چاپیریال څخه د پلاستيکي خځلو د راټولو لپاره پر ګډه همکارۍ ژمنه وکړه.