وروستی
د اقلیمي بدلون نړیواله اونۍ په ننګرهار کې ولمانځل شوه
د چاپیریال ساتنې ملي ادارې له خوا د ننګرهار ولایت د چاپیریال ساتنې ریاست په همغږۍ، د ملګرو ملتونو د چاپیریال پروګرام (UNEP) په همکارۍ، د اقلیمي بدلون نړیواله اونۍ د تلې په ۲۵مه نېټه د شانداره مراسمو په ترڅ کې د ننګرهار پوهنتون د غونډو په تالار کې ولمانځل شوه. په دې مراسمو کې د ننګرهار مرستیال والي، تمیم عارف مومند، د چاپېریال ساتنې ملي ادارې د اقلیمي بدلون سرپرست، احمد صمیم هوشمند، د ننګرهار پوهنتون رئیس، پوهاند دوکتور خلیل احمد بهسودوال، ننګرهار ولایت د چاپیریال ساتنې رئیس، پوهنمل امین الله یوسفزي، د ولایتي ادارو رئیسانو، د ننګرهار پوهنتون استادانو او محصیلینو، د علماوو شورا استازو، د مدني ټولنو او رسنیو استازو ګډون کړی وو. د غونډې په پیل کې د ننګرهار پوهنتون رئیس پوهاند دوکتور خلیل احمد بهسودوال د اقلیمي بدلون پر ناوړه اغیزو، ګواښونو سره د سازښت او مبارزې په هکله هر اړخیزه وینا وکړه. د ننګرهار مرستیال والي هم د اقلیمي بدلون د ناوړه اغېزو په هکله وینا وکړه او په ټولو هېوادوالو یې غږ وکړ چې په خپلو کورونو کې د اقلیمي بدلون سره د سازښت او مبارزې او هم د چاپېریال ساتنې په اړه عامه پوهاوی وکړي. ښاغلي هوشمند د مرکزي ادارې په استازیتوب وینا وکړه او د اقلیمي بدلون پر ګواښونو، مبارزې او سازښت په اړه يې معلومات وړاندې کړل. د ننګرهار ولایت د چاپېریال ساتنې رئیس پوهنمل امین الله یوسفزي د خپلو فعالیتونو په اړه ګډونوالو ته معلومات ورکړل او د اقلیمي بدلون لامل یې په ننګرهار کې د نفوسو ډیرښت، د ترانسپورتي وسایطو زیاتوالی، بې کېفیته سونګ توکو سوځول، د ښار په داخل کې کوچنی پاشلی غیر فني صنعت، د ځنګلونو او شنو ساحو محدودیت او د چاپېریال ساتنې په برخه کې د خلکو کم رنګه ونډه وبلله. همدا راز د ننګرهار پوهنتون د کرنې پوهنځي رئیس پوهنوال سیدا جان عتیق عبدیاني په کرنه د اقلیمي بدلون پر اغیزو بشپړ بحث وکړ او له خلکو یې په دې برخه کې د همکارۍ غوښتنه وکړه. د یادونې وړ ده، چې د غونډې په پای کې د اقلیمي بدلون په اړه درې ورځني روزنیز ورکشاپ چې وړاندې پای ته رسیدلی وو، ګډونوالو ته یې تصدیق پاڼې وویشل شوې.