وروستی
د ژوند د چاپېریال قانون مسوده بیا کتني ته وړاندي شوه
۱۴۴۴کال
د ذوالحجې ۲۲مه/
کابل
د چاپېریال ساتنې
ملي ادارې لخوا (د ژوند د چاپېریال قانون) باندې بیا کتنه وشوه چې په همدې مناسبت
د دې ادارې د بند امیر غونډو په تالار کې د اړوندو ادارو (کرنې، اوبو لګولو او
مالدارۍ وزارت؛ اوبو او انرژۍ وزارت؛ اطلاعات او فرهنګ وزارت؛ مالیې وزارت؛
ترانسپورت وزارت او صنعت او تجارت وزارت) استازو او د دې ادارې متخصصینو خپل نظریات
او وړاندیزونه شریک کړه.
د ژوند د چاپېریال قانون کې ځینې موارد وه چې اصلاح ته یې اړتیا
لرله او د اړوندو ادارو تر منځ د بحث وړ وو چې د کاري صلاحیتونو د مشخص کولو او ځینو
نورو برخو کي د اصلاح لپاره پرې له مودو راهیسې د دې ادارې متخصصینو کار کړی و او
د یاد قانون اصلاح شوې مسوده یې د نظر غوښتنې لپاره اړوندو ادارو ته استولې وه.
د ژوند د چاپېریال قانون د بیاکتنې او د اړوندو ادارو د
نظرونو او وړاندیزونو د اوډنې په موخه مشوورتي غونډه ترسره شوه چې پکې هر اړخیز
بحث وشو او پرېکړه وشوه چې د یاد قانون د لا بډاینې لپاره باید د متخصصینو لخوا
نور کار هم پرې وشي او په راتلونکې غونډه کې به یې تر بحث وروسته وروستنۍ مسوده د
تائید لپاره نورو اړوند ذیصلاح مراجعو ته ولېږل شي.