وروستی
د کابل ښار د فاضلابو ټانکرونو د تخلیې د مخنیوي په تړاو غونډه وشوه
د ۱۴۴۴ق کال د ذوالحجې ۲۳ نېټه/ کابل
د ا.ا.ا د وزیرانو شورا په ۳۵مه غونډه کې په کابل سیند او
زراعتي ځمکو کې د فاضلانو ټانکرونو د تخلیې د مخنیوي او د فاضلابو د مدیریت په تړاو
د چاپېریال ساتنې ملي ادارې ته دنده سپارل شوې چې له اړوندو وزارتونو (د مالیې
وزارت، اوبو او انرژۍ وزارت، کرنې، اوبو لګولو او مالدارۍ وزارت، د ښار جوړونې
وزارت او کابل ښاروالۍ) په ګډه همکارۍ دې د فاضلابو د مدیریت لپاره یوه مناسبه
طرحه جوړه کړي.
په همدې موخه د چاپېریال ساتنې ملي ادارې پالیسي او مسلکي
معین ډاکټر زین العابدین عابد په مشرۍ دویمه غونډه ترسره شوه چې پکې د اړوندو
ادارو استازو او متخصصینو ګډون کړی وو.
په پیل کې د چاپېریال ساتنې ملي ادارې پالیسي او مسلکي معین
وویل چې فاضلاب باید داسې ځای ته انتقال شي چې زموږ هېوادوالو او چاپېریال ته زیان
و نه رسوي.
ښاغلي عابد زیاته کړه د دې ستونزې د حل لپاره د چاپېریال
ساتنې ملي ادارې لخوا یوه ابتدایي طرحه جوړه شوې ده چې د کمیټې د غړو تخنیکي
نظرونه او وړاندیزونه به هم پکې شامل شي او وروسته به د وزیرانو شورا سره شریکه
شي.
د غونډې په لړ کې په کابل سیند او کرنیزو ځمکو کې د فاضلابو
د تخلیې د مخنیوي او د حل لارو چارو په تړاو جوړه شوې طرحه له ګډونوالو سره شریکه
او هر اړخیز بحث پرې وشو.
په پای کې پرېکړه وشوه چې د اړوندو وزارتونو له خوا دې د
کابل ښار په څلورو زونونو کې د غیر متمرکزو تصفیه خانو د جوړولو لپاره ځایونه مشخص
شي ترڅو له تخنیکي سروې او څېړنو وروسته د تصفیه خانو د جوړولو عملي چارې پیل شي.