وروستی
د حيرتان ښارګوټي له رئيس او پانګه والو سره ليدنه
د چاپېريال ساتنې ملي ادارې عمومي رئيس شاه زمان ميوندي او ورسره پلاوي يې د حيرتان ښارګوټي له رئيس قاري عبدالروف رحيمي سره وليدل او د حيرتان بندر اړوندو چاپېريالي موضوعاتو په اړه يې خبرې وکړې. ښاغلي میوندي د ياد ښارګوټي د مسولينو له ګرم استقبال څخه د مننې ترڅنګ د لسهاو زرو نياليګو د کېنولو او څارنې په برخه کې يې د دوی هڅې وستايلې او دا يې د چاپېريال د ساتنې به برخه کې ګټور او اغېزمن ګام وباله. همدارنګه د چاپېريال ساتنې ملي ادارې عمومي رئيس د حيرتان بندر ځينو سوداګرو او پانګه اچوونکو سره ليدنه وکړه او په مختلفو برخو کې د دوی د شته ستونزو له اورېدو څخه وروسته يې ژمنه وکړه چې د پانګه اچوونکو ستونزو د حل په موخه به پوره هڅې وکړي. د ګاونډيو هېوادونو لخوا د ټکس لوړوالی او هغه زمکې چې پرې پانګه اچونه شوې ده خو اوس په نامعلوم وضعيت کې قرار لري او يو شمېر نور مسايل هغه ستونزې وې چې دوی په دې ليدنه کې د چاپېريال ساتنې ملي ادارې له عمومي رئيس سره شریکې کړې.