وروستی
په هلمند کې د اقليمي بدلون نړيواله اونۍ د یو لړ مراسمو په ترڅ کې ولمانځل سوه
۱۴۴۵کال
د ربیع الثاني ۶مه
نېټه/هلمند
د هلمند ولایت د چاپېریال ساتنې ریاست د روان کال د تلې په ۲۷مه نېټه "د راتلونکي اقلیمي
ثبات لپاره د افکار تړون" تر عنوان لاندې د اقلیمي بدلون نړۍواله اونۍ د یو لړ
مراسمو په ترڅ کې ولمانځل شوه.
یاده لمانځغونډه چې د هلمند دولتي پوهنتون د غونډو په تالار
کې جوړه شوې وه پکې د پوهنتون استادانو، اړوندو ادارو استازو، علمای کرامو، د ګذر
وکیلانو او محصلینو ګډون کړی وو.
غونډه د قران کریم د څو مبارکو آیاتونو په تلاوت پیل شوه او
ورپسې د هلمند ولایت د عامه پوهاوي عمومي مدیر سید احمد نظري د اقلیمي بدلون د اغیزو،
تاریخچې او عواملو په تړاو خبرې وکړې.
د هلمند ولایت د چاپېریال ساتنې رئیس محمد عیسی آغا د چاپېریال
ساتنې ریاست په اوسنیو اجراتو او راتلوونکو پلانونو په تفصیل سره خبرې وکړې او ویې
ویل: چاپېریال پاک ساتل د هر کس وجیبه ده چې باید دولت او ملت یو د بل سره په دې
برخه کې زیاته همکاري وکړي. ده زیاته کړه: هېوادوال باید د شنو او ښېرازه ساحو په
رامنځته کولو کې نهایي هڅه وکړي، ځکه همدا شنې درختې دي چې له یو خوا پاک او سالم
چاپېریال جوړوي او له بلې خوا د سېلابونو او طوفاني بادونو څخه مخنیوي هم کوي.
نوموړي وویل چې د پلاستیکي کڅوړو او پلاستیکي توکو څخه باید استفاده راکمه او په ځای
یې کاغذي کڅوړې د یوه بدیل په توګه استفاده شي.
د غونډې په لړ کې د هلمند پوهنتون علمي مرستیال، د پوهنتون
نورو استادانو، علماوو کرامو او د ښاروالۍ استازي د اقلیمي بدلون د ناوړه اغیزو او
لاملونو په هکله ویناوې وکړې. ویناوالو په خپلو خبرو کې د چاپېریال د ککړتیا د مخنیوي،
په نړیواله کچه د چاپېریال په اغېزمنتیا او زموږ په نړۍ او ټولنه د هغه په منفي
تاثیر مفصلې خبرې وکړې. هر مسول کس په یاده برخه کې د چاپېریال ساتنې ریاست سره د
همکارۍ ژمنه وکړه او د ملاتړ ډاډ یې ورکړ او غونډه د عایې په لوستلو پای ته ورسېده
